उपराष्ट्रपदी पदाच्या शनिवारच्या मतदानापासून दूर राहण्याचे आदेश तृणमूल काँग्रेसने आपल्या तमाम खासदारांना दिले होते. परंतु पश्चिम बंगालच्या कांथी येथील खासदार शिशीर अधिकारी यांनी पक्षाचा आदेश डावलून मतदान केले. शिशीर यांच्याबरोबरच त्यांचे खासदार पूत्र दिव्येंदू अधिकारी यांनी देखील संसद भवनात दुपारी उपराष्ट्रपती पदाच्या निवडणुकीत मतदान केले. या मतदानातून पिता- पूत्रांनी तृणमूल पक्षाच्या अध्यक्ष ममता बॅनर्जी यांना धक्का दिला आहे. हे दोघेही भाजपा नेते शुभेंदू अधिकारी यांच्या कुटुंबातील आहेत.
उपराष्ट्रपती पदाच्या निवडणुकीत केवळ लोकसभा व राज्यसभा खासदारांनाच मत देण्याचा अधिकार असतो. त्यामुळे तृणमूल कॉंग्रेस पक्षाने आपल्या सर्व खासदारांना मतदान प्रक्रियेत सहभागी होऊ नका असे सांगितले होते. त्यानुसार शनिवारी होणाऱ्या राष्ट्रपतीपदाच्या निवडणुकीत मतदानात भाग घेणार नसल्याचे तृणमूल पक्षाने आधीच जाहीर केलेले होते.
शिशिर हे भारतीय जनता पक्षाचे आमदार आणि विधानसभेतील विरोधी पक्षनेते शुभेंदू अधिकारी यांचे वडील आहेत, तर दिव्येंदू त्यांचा भाऊ आहे. अधिकाऱ्याच्या कुटुंबीयांच्या निकटवर्तीयांनी दिलेल्या माहितीनुसार, राष्ट्रपती आणि उपराष्ट्रपतीपदाच्या निवडणुकीत पक्ष व्हीप जारी करू शकत नाही.
हे ही वाचा:
राष्ट्रकुल स्पर्धेत कुस्तीत भारताला तिहेरी सुवर्णपदक
वझीरएक्स क्रिप्टो एक्सचेंजची ६४ कोटींची बँक मालमत्ता ईडीने गोठवली
केसरकर म्हणतात, तेव्हा उद्धव ठाकरे राजीनामा देणार होते
शिशीर- दिव्येंदु यांना पाठवले होते पत्र
पक्षापासून अंतर ठेवून असलेले खासदार शिशीर दिव्येंदु या दोघांनाही तृणमूल पक्षाचे नेते सुदीप बॅनर्जी यांनी पत्र पाठवून उपराष्ट्रपतीपदाच्या निवडणुकीपासून दूर राहण्याचे निर्देश दिले होते. सुदीप यांनी या पत्राची एक प्रत लोकसभाध्यक्षांनाही पाठवली होती. पण तरीही शिशिर आणि दिव्येंदू यांनी पक्षाच्या आदेशाला बगल देत शनिवारी अध्यक्षपदाच्या निवडणुकीत भाग घेतला.दिव्येंदु हे तमलूक येथील खासदार आहेत.
.
तृणमूलला सोडचिठ्ठी देऊन भाजपमध्ये
२०१९ मध्ये शिशिर अधिकारी टीएमसीच्या तिकिटावर खासदार म्हणून निवडून आले होते. २०२१ च्या बंगाल विधानसभा निवडणुकीपूर्वी त्यांनी टीएमसी सोडली आणि भाजपमध्ये प्रवेश केला. मात्र, शिशिर अधिकारी यांनी लोकसभा सदस्यत्वाचा राजीनामा दिला नाही. त्याचप्रमाणे त्यांचा मुलगा दिव्येंदू अधिकारीही टीएमसीपासून दूर जात आहे.
