राज्यसभा सदस्य राघव चड्ढा यांनी सोशल मीडियाच्या माध्यमातून आम आदमी पार्टीकडून त्यांच्यावर लावण्यात आलेल्या आरोपांना जोरदार प्रत्युत्तर दिले आहे. त्यांनी स्पष्ट सांगितले की पक्षाचे सर्व आरोप निराधार आणि हास्यास्पद आहेत. राघव चड्ढा यांनी सोशल मीडिया प्लॅटफॉर्म ‘एक्स’वर पोस्ट करत म्हटले, “मला बोलायचे नव्हते, पण शांत राहिलो तर वारंवार सांगितलेले खोटेही खरे वाटू लागते. तीन आरोप—एकही खरा नाही.”
यासोबतच त्यांनी एक व्हिडिओही शेअर केला असून त्यात ते म्हणतात की कालपासून त्यांच्या विरोधात पूर्णपणे स्क्रिप्टेड मोहीम चालवली जात आहे. हा योगायोग नसून एक नियोजित आणि समन्वयित हल्ला आहे. सुरुवातीला त्यांनी याकडे दुर्लक्ष करण्याचा विचार केला होता, पण वारंवार खोटे सांगितल्यास लोक ते खरे मानतील, असे वाटल्याने त्यांनी उत्तर देणे आवश्यक मानले.
चड्ढा म्हणाले, पहिला आरोप असा करण्यात आला की विरोधक सभागृहातून वॉकआउट करत असताना ते तिथेच बसून राहतात आणि साथ देत नाहीत. त्यांनी हा आरोप पूर्णपणे खोटा ठरवला आणि सांगितले की त्यांनी प्रत्येक वॉकआउटमध्ये सहभाग घेतला आहे. त्यांनी आव्हान दिले की ते कधी वॉकआउटमध्ये सहभागी झाले नाहीत, असा एकही उदाहरण दाखवावा. राज्यसभेत सर्वत्र सीसीटीव्ही कॅमेरे आहेत आणि त्यातून सत्य सहज समोर येऊ शकते, असेही त्यांनी म्हटले.
दुसरा आरोप असा होता की मुख्य निवडणूक आयुक्तांविरोधातील महाभियोग प्रस्तावावर त्यांनी स्वाक्षरी करण्यास नकार दिला. यालाही त्यांनी खोटे ठरवले. त्यांनी सांगितले की याबाबत त्यांना ना अधिकृतरीत्या, ना अनौपचारिकरीत्या कोणतीही विनंती करण्यात आली. आम आदमी पार्टीच्या दहा खासदारांपैकी अनेकांनी स्वतःही त्या प्रस्तावावर स्वाक्षरी केली नव्हती. या याचिकेसाठी ५० स्वाक्षऱ्या आवश्यक होत्या, तर विरोधी पक्षांकडे १०५ खासदार आहेत. तरीही सगळा दोष माझ्यावर का टाकला जात आहे, हे समजत नाही, असे त्यांनी म्हटले.
हे ही वाचा:
३.५ अब्ज डॉलर्सचे कर्ज परत करा!
‘भाजपला मतदान करू नका…’ मतदारांना धमकावणारा तृणमूलचा कार्यकर्ता अटकेत
डॉ. सच्चिदानंद शेवडे यांचे ‘हिंदू- काल आणि आज’ या विषयावर व्याख्यान
पाकिस्तानात तेलासोबत वीज संकट; कोळशाच्या कमतरतेमुळे ३०% वीज उत्पादन धोक्यात
तिसरा आरोप असा होता की राघव चड्ढा घाबरले आहेत आणि म्हणूनच ते निरर्थक मुद्दे उपस्थित करतात. यावर त्यांनी स्पष्ट केले की ते संसदेत गोंधळ घालण्यासाठी किंवा अपशब्द वापरण्यासाठी जात नाहीत. त्यांचा उद्देश जनतेचे प्रश्न मांडणे हा आहे. त्यांनी जीएसटी, आयकर, पंजाबमधील पाणी प्रश्न, दिल्लीतील वायूप्रदूषण, सरकारी शाळांची स्थिती, सार्वजनिक आरोग्य व्यवस्था, रेल्वे प्रवाशांच्या समस्या, मासिक पाळी आरोग्य, बेरोजगारी आणि महागाई यांसारखे अनेक मुद्दे संसदेत उपस्थित केल्याचे सांगितले. त्यांच्या चार वर्षांच्या कामगिरीत हे स्पष्ट दिसून येते, असेही त्यांनी नमूद केले.
मैं बोलना नहीं चाहता था, मगर चुप रहता तो बार-बार दोहराया गया झूठ भी सच लगने लगता।
Three Allegations. Zero Truth.
My Response: pic.twitter.com/tPdjp04TLt
— Raghav Chadha (@raghav_chadha) April 4, 2026
शेवटी चड्ढा यांनी ठामपणे सांगितले की जे लोक त्यांच्यावर खोटे आरोप करत आहेत, त्यांच्या प्रत्येक खोट्याचा पर्दाफाश केला जाईल आणि प्रत्येक प्रश्नाचे उत्तर दिले जाईल. “मी जखमी आहे, त्यामुळे आणखी घातक आहे,” असेही त्यांनी म्हटले.
