अर्शदीप-सँटनरला १५० बळींचा टप्पा खुणावतोय

भारत आणि न्यूझीलंड यांच्यात सुरू असलेल्या टी-२० मालिकेतील चौथ्या सामन्यात दोन गोलंदाजांच्या कामगिरीकडे क्रिकेटविश्वाचे लक्ष लागले आहे. भारताचा वेगवान गोलंदाज अर्शदीप सिंग आणि न्यूझीलंडचा कर्णधार मिचेल सँटनर यांना आंतरराष्ट्रीय टी-२० क्रिकेटमध्ये १५० बळींचा टप्पा गाठण्याची सुवर्णसंधी आहे. शुक्रवारी होणाऱ्या या सामन्यात प्रत्येकी एक बळी मिळवताच दोघांच्या नावावर ऐतिहासिक कामगिरीची नोंद होईल.

भारताचा डावखुरा वेगवान गोलंदाज अर्शदीप सिंग याने आतापर्यंत १०२ आंतरराष्ट्रीय टी-२० सामन्यांत १४९ बळी मिळवले आहेत. चौथ्या सामन्यात एक बळी घेताच आंतरराष्ट्रीय टी-२० क्रिकेटमध्ये १५० बळी पूर्ण करणारा तो भारताचा पहिला गोलंदाज ठरेल. याशिवाय, या प्रकारात १५० बळी घेणारा तो डावखुरा वेगवान गोलंदाजांमधील जगातील दुसरा गोलंदाज ठरेल. बांगलादेशचा मुस्तफिझूर रहमान याने यापूर्वी ही कामगिरी केली असून त्याच्या नावावर १३० सामन्यांत १६३ बळी आहेत.

सँटनरसमोरही ऐतिहासिक संधी

न्यूझीलंडचा कर्णधार मिचेल सँटनर यालाही १५० आंतरराष्ट्रीय टी-२० बळी पूर्ण करण्यासाठी केवळ एका बळीची आवश्यकता आहे. त्याने आतापर्यंत १४१ सामन्यांत १४९ बळी मिळवले आहेत. चौथ्या सामन्यात बळी घेतल्यास आंतरराष्ट्रीय टी-२० क्रिकेटमध्ये १५० बळींचा टप्पा गाठणारा तो डावखुरा फिरकीपटूंमधील पहिला गोलंदाज ठरू शकतो.

विशेष म्हणजे, अर्शदीप आणि सँटनर हे दोघेही सध्या आंतरराष्ट्रीय टी-२० क्रिकेटमध्ये सर्वाधिक बळी घेणाऱ्या गोलंदाजांच्या यादीत संयुक्तपणे नवव्या स्थानावर आहेत. बांगलादेशचा माजी कर्णधार शाकिब अल हसन यानेही १२९ सामन्यांत १४९ बळी मिळवले आहेत.

राशिद खान अव्वल

आंतरराष्ट्रीय टी-२० क्रिकेटमध्ये सर्वाधिक बळी घेण्याचा विक्रम अफगाणिस्तानच्या राशिद खानच्या नावावर आहे. त्याने ११९ सामन्यांत १९९ बळी मिळवले आहेत. इंग्लंडचा आदिल रशीद १५३ सामन्यांत १७१ बळींसह दुसऱ्या स्थानावर आहे.

हॉंगकॉंगचा एहसान खान आणि न्यूझीलंडचे ईश सोढी यांनी प्रत्येकी १६५ बळी मिळवले आहेत. एहसानने ११९, तर सोढीने १४२ सामने खेळले आहेत. न्यूझीलंडचाच टीम साऊदी १२६ सामन्यांत १६४ बळींसह पाचव्या स्थानावर आहे.

चौथ्या टी-२० सामन्यात अर्शदीप आणि सँटनर यांच्यापैकी कोण आधी ऐतिहासिक टप्पा गाठतो, याची उत्सुकता क्रिकेट चाहत्यांना असेल. भारत-न्यूझीलंड सामन्यातील विजयाच्या लढतीसोबतच या दोन गोलंदाजांच्या विक्रमी कामगिरीवरही नजर राहणार आहे.