भारतीय क्रिकेटमधील उदयोन्मुख सुपरस्टार वैभव सूर्यवंशी पुन्हा एकदा चर्चेत आला आहे. मात्र यावेळी त्याच्या फलंदाजीमुळे नव्हे, तर ICCच्या एका विशेष नियमामुळे. इंग्लंड दौऱ्यावर टीम इंडियासोबत असतानाही वैभवला संघाच्या चेंजिंग रूममध्ये इतर वरिष्ठ खेळाडूंप्रमाणे कपडे बदलण्याची परवानगी मिळणार नाही. ICC आणि इंग्लंड अँड वेल्स क्रिकेट बोर्ड (ECB) यांच्या बालसुरक्षा नियमांनुसार १६ वर्षांखालील खेळाडूंना प्रौढ खेळाडूंसोबत चेंजिंग रूम वापरण्यास मनाई आहे. त्यामुळे १५ वर्षीय वैभवसाठी स्वतंत्र चेंजिंग रूमची व्यवस्था करण्यात येणार आहे.
वैभव लवकरच आयर्लंडविरुद्धच्या टी-२० सामन्यातून भारतासाठी आंतरराष्ट्रीय पदार्पण करू शकतो. त्यानंतर तो इंग्लंडविरुद्धच्या पाच सामन्यांच्या टी-२० मालिकेतही सहभागी होणार आहे. मात्र त्याच्या अल्पवयामुळे ICCचे सुरक्षा नियम लागू होतील. सामना सुरू असताना किंवा संघाच्या बैठकींमध्ये सहभागी होण्यास त्याला कोणतीही अडचण नसणार आहे. परंतु सामना सुरू होण्यापूर्वी आणि संपल्यानंतर कपडे बदलताना त्याला स्वतंत्र सुविधा वापराव्या लागतील.
हे ही वाचा:
रेल्वेचा सुपरफास्ट प्लॅन! ट्रेन धावणार १६० किमी वेगाने
तरुणीच्या होणाऱ्या पतीला खासगी फोटो पाठवले, तिघांचा गेला जीव
पद्म पुरस्काराने गौरविलेल्या मणी यांना हिंदू दहशतवादाच्या षडयंत्रात गोवले गेले!
विशेष म्हणजे वैभवच्या इंग्लंड दौऱ्यात त्याचे आई-वडीलही त्याच्यासोबत राहणार आहेत. भारतीय क्रिकेट नियामक मंडळाने (BCCI) त्याच्या वयाचा विचार करून हा निर्णय घेतला आहे. संघ व्यवस्थापनाचे मत आहे की, वैभव अत्यंत प्रतिभावान असला तरी तो अजूनही एक किशोरवयीन मुलगा आहे आणि अशा मोठ्या आंतरराष्ट्रीय दौऱ्यावर त्याला कुटुंबाच्या पाठिंब्याची गरज आहे.
राजस्थान रॉयल्सकडून IPLमध्ये धडाकेबाज कामगिरी करत वैभवने क्रिकेटविश्वाचे लक्ष वेधले आहे. २०२६ च्या हंगामात त्याने तब्बल ७७६ धावा करत सर्वाधिक धावा करणाऱ्या फलंदाजाचा मान मिळवला. तसेच एका हंगामात सर्वाधिक षटकारांचा विक्रमही त्याने आपल्या नावावर केला. अलीकडेच भारत अ संघाकडून श्रीलंका अ विरुद्ध २९ चेंडूत ९४ धावांची स्फोटक खेळी करत त्याने निवडकर्त्यांना प्रभावित केले होते.
इंग्लंड दौऱ्यावर वैभवसाठी स्वतंत्र चेंजिंग रूमची व्यवस्था ही कोणतीही शिक्षा नसून त्याच्या सुरक्षिततेसाठी आणि कल्याणासाठी घेतलेला निर्णय आहे. त्यामुळे भारतीय क्रिकेटचा हा युवा तारा आता आणखी एका ऐतिहासिक टप्प्याकडे वाटचाल करत असून, संपूर्ण क्रिकेटविश्वाचे लक्ष त्याच्या पदार्पणाकडे लागले आहे.
