सूरमाचा सुवर्णधडाका, राम रतनची रौप्यभरारी

आशियाई पॅरा गेम्स २०२६ मध्ये भारतीय खेळाडूंनी दमदार कामगिरीचा सिलसिला कायम ठेवला आहे. पुरुषांच्या डिस्कस थ्रो एफ५१/५२/५३ प्रकारात भारताच्या प्रणव सूरमा आणि राम रतन सिंह यांनी अनुक्रमे सुवर्ण आणि रौप्यपदक जिंकत भारताला दुहेरी यश मिळवून दिले. प्रणव सूरमा याने ११.६६ मीटर अंतरावर चक्र फेकत नवा आशियाई विक्रम प्रस्थापित केला.

प्रणवने आपल्या चौथ्या प्रयत्नात ११.६६ मीटर अंतराची नोंद केली. या कामगिरीसाठी त्याला ९३२ राझा गुण मिळाले आणि त्याने स्पर्धेत अव्वल स्थान पटकावले. त्याने पहिल्या प्रयत्नात १०.७९ मीटर अंतर गाठले, तर दुसरा प्रयत्न फाऊल ठरला. तिसऱ्या प्रयत्नात ११.३५ मीटर अंतराची नोंद केल्यानंतर चौथ्या प्रयत्नात त्याने सर्वोत्तम कामगिरी करत आशियाई विक्रमाला गवसणी घातली. पाचव्या प्रयत्नात त्याने ११.५४ मीटर, तर सहाव्या प्रयत्नात १०.५९ मीटर अंतर नोंदवले.

भारताच्याच राम रतन सिंह याने १०.३५ मीटर अंतरावर चक्र फेकत रौप्यपदकावर नाव कोरले. त्याला ८०९ राझा गुण मिळाले. पहिला प्रयत्न फाऊल ठरल्यानंतर दुसऱ्या प्रयत्नात त्याने सर्वोत्तम कामगिरी केली. मात्र, त्यानंतरच्या प्रयत्नांत त्याला ही कामगिरी सुधारता आली नाही. त्याचे तिसरे आणि चौथे प्रयत्न फाऊल ठरले. पाचव्या प्रयत्नात त्याने १०.०२ मीटर, तर सहाव्या प्रयत्नात १०.१३ मीटर अंतर नोंदवले.

प्रणव सूरमाने यापूर्वीच्या आशियाई पॅरा गेम्समध्ये एफ५१ क्लब थ्रो प्रकारात सुवर्णपदक जिंकले होते. तसेच, २०२४ मध्ये पॅरिस येथे झालेल्या पॅरालिम्पिक स्पर्धेत त्याने याच प्रकारात रौप्यपदक मिळवले होते. आता आशियाई पॅरा गेम्समध्ये आशियाई विक्रमासह सुवर्णपदक पटकावत त्याने आपल्या यशात आणखी एक मानाचा तुरा खोवला आहे.

या स्पर्धेत इराणच्या अलीरेजा हेमामी याने एफ५३ प्रकारात २०.२० मीटर अंतराची नोंद करत तिसरे स्थान मिळवले. दरम्यान, भारताचा जलतरणपटू हिमांशू नंदल याने पुरुषांच्या ४०० मीटर फ्रीस्टाइल एस११ प्रकारात ५ मिनिटे १०.९१ सेकंदांची वेळ नोंदवत कांस्यपदक जिंकले. त्यामुळे भारताच्या पदकतालिकेत आणखी एका पदकाची भर पडली.