टेकबॉलमध्ये क्विमसीची उपांत्य फेरीत धडक; पदकापासून एक विजय दूर

एशियन गेम्स २०२६मध्ये भारताची क्विमसी जोआकिम डिसूजा हिने टेकबॉलमध्ये शानदार कामगिरी करत महिला एकेरीच्या उपांत्य फेरीत प्रवेश केला आहे. एशियन गेम्समध्ये पदार्पण करणाऱ्या क्विमसीने सलग विजय मिळवत पदकापासून अवघा एक विजय दूर झेप घेतली आहे.

नागोया सिटी हिगाशी स्पोर्ट्स सेंटरमध्ये झालेल्या ग्रुप ए सामन्यात क्विमसीने कंबोडियाच्या कोएम्यान डीवाईचा २-० असा पराभव केला. या विजयासह तिने महिला एकेरीच्या उपांत्य फेरीत थेट प्रवेश मिळवला.

क्विमसीने ग्रुप ए मधील पहिल्या सामन्यात जपानच्या युइना सकामोटोचा १०-११, १२-११, १३-११ असा रोमांचक पराभव केला होता. त्यानंतर कंबोडियाच्या कोएम्यानविरुद्धही तिने दमदार खेळ करत विजय मिळवला.

आता उपांत्य फेरीत क्विमसीसमोर इंडोनेशियाच्या इमा सुमाया हिचे आव्हान असणार आहे. या सामन्यात विजय मिळवल्यास क्विमसीचे एशियन गेम्समधील पदक निश्चित होणार आहे. त्यामुळे तिच्या पदार्पणाकडे सर्वांचे लक्ष लागले आहे.

मिश्र दुहेरीतही क्विमसीचा विजय

क्विमसीने मोहम्मद अनस इमरान बेग याच्यासोबत मिश्र दुहेरीतही भारताचे प्रतिनिधित्व केले. ग्रुप ए मधील पहिल्या सामन्यात भारतीय जोडीने फिलिपिन्सच्या जोआना अबुलेंसिया आणि प्रिन्स अगस्टिन यांच्या जोडीवर विजय मिळवला.

यानंतर भारतीय जोडीला कंबोडिया, थायलंड आणि कुवैतच्या जोड्यांविरुद्ध सामने खेळायचे आहेत.

दरम्यान, डेक्लान मार्शल गोंसाल्वेस आणि मोहम्मद अनस इमरान बेग ही भारतीय पुरुष दुहेरीची जोडी गुरुवारी टेकबॉलमध्ये एशियन गेम्सच्या मैदानात उतरणारी भारताची पहिली जोडी ठरली. मात्र, दोन्ही ग्रुप सामने गमावल्याने त्यांचे आव्हान संपुष्टात आले.

टेकबॉल हा हंगेरीमध्ये विकसित झालेला खेळ असून, त्यामध्ये फुटबॉलमधील कौशल्ये आणि वक्र टेबलचा वापर केला जातो. एशियन गेम्समध्ये आयची-नागोया २०२६पासून टेकबॉलचा प्रथमच समावेश करण्यात आला आहे. पुरुष एकेरी, महिला एकेरी, पुरुष दुहेरी, महिला दुहेरी आणि मिश्र दुहेरी अशा पाच पदक स्पर्धा यामध्ये होणार आहेत.