न्यूझीलंडविरुद्ध सुरू असलेल्या तीन सामन्यांच्या एकदिवसीय मालिकेतून भारतीय अष्टपैलू वॉशिंगटन सुंदर दुखापतीमुळे बाहेर पडला आहे. त्याच्या जागी आयुष बडोनी याला भारतीय संघात स्थान देण्यात आले आहे. बडोनीसाठी ही भारतीय संघातील पहिलीच निवड ठरली आहे.
बीसीसीआयने आपल्या अधिकृत ‘एक्स’ (ट्विटर) हँडलवरून न्यूझीलंडविरुद्धच्या वनडे मालिकेसाठी वॉशिंगटन सुंदरच्या रिप्लेसमेंट म्हणून आयुष बडोनीच्या नावाची घोषणा केली. रविवारी खेळल्या गेलेल्या पहिल्या वनडे सामन्यात गोलंदाजी करताना सुंदरला दुखापत झाली होती.
बीसीसीआयने दिलेल्या माहितीनुसार, पहिल्या वनडेदरम्यान सुंदरच्या डाव्या खालच्या बरगडीजवळ तीव्र वेदना जाणवल्या. त्याचे पुढील स्कॅन होणार असून त्यानंतर बीसीसीआयची वैद्यकीय टीम तज्ज्ञांचा सल्ला घेणार आहे. त्यामुळे आयडीएफसी फर्स्ट बँक वनडे मालिकेतील उर्वरित दोन सामन्यांतून सुंदर बाहेर झाला आहे. पुरुष निवड समितीने त्याच्या जागी आयुष बडोनीची निवड केली असून बडोनी दुसऱ्या वनडेसाठी राजकोट येथे संघात दाखल होणार आहे.
टी-२० विश्वचषक २०२६ साठी भारतीय संघात सुंदरचा समावेश असल्याने त्याची दुखापत ही संघासाठी चिंतेची बाब मानली जात आहे.
२६ वर्षीय आयुष बडोनी दिल्लीकडून देशांतर्गत क्रिकेट खेळतो. त्याने आत्तापर्यंत २१ प्रथम श्रेणी आणि २७ लिस्ट-ए सामने खेळले आहेत. प्रथम श्रेणी क्रिकेटमध्ये त्याने ४ शतके आणि ७ अर्धशतकांच्या जोरावर १,६८१ धावा केल्या असून त्याची सर्वोच्च धावसंख्या नाबाद २०५ आहे. तर लिस्ट-ए क्रिकेटमध्ये २२ डावांत १ शतक व ५ अर्धशतकांच्या मदतीने त्याने ६९३ धावा केल्या आहेत.
आयपीएलमध्ये बडोनी **लखनौ सुपर जायंट्स**कडून खेळतो. २०२२ पासून तो या संघाचा भाग असून, आतापर्यंत ४ हंगामांत खेळलेल्या ५६ सामन्यांत १० वेळा नाबाद राहत त्याने ६ अर्धशतकांसह ९६३ धावा केल्या आहेत.
