श्रेयसच्या शतकी तडाख्याने पुजारा प्रभावित

वेस्ट इंडिजविरुद्ध लखनऊ येथे झालेल्या पहिल्या टी-२० सामन्यात कर्णधार श्रेयस अय्यरने झळकावलेल्या नाबाद शतकाने भारताचे माजी फलंदाज चेतेश्वर पुजारा प्रभावित झाले आहेत. अय्यरची ही खेळी अगदी योग्य वेळी आली असून, कर्णधार म्हणून त्याने युवा खेळाडूंसमोर आदर्श निर्माण केला, असे पुजारांनी म्हटले आहे.

भारताने वेस्ट इंडिजवर ८ विकेट्सने विजय मिळवत पाच सामन्यांच्या मालिकेत १-० अशी आघाडी घेतली. भारताची सुरुवात अडखळत झाली होती. ३५ धावांवर २ विकेट्स गमावल्यानंतर अय्यरने डावाची सूत्रे हाती घेतली. त्याने अवघ्या ४३ चेंडूंत नाबाद १०२ धावा करत भारताला ३२ चेंडू शिल्लक असतानाच विजय मिळवून दिला.

पुजारांनी ‘जिओहॉटस्टार’शी बोलताना अय्यरच्या खेळीचे कौतुक केले. “हे शतक अगदी योग्य वेळी आले. अय्यरला फॉर्मची गरज होती. टी-२० प्रकारात तो एक उत्कृष्ट क्रिकेटपटू आहे आणि त्याच्या क्षमतेबाबत कोणतीही शंका नाही,” असे पुजारा म्हणाले.

अय्यरने सुरुवातीपासूनच चेंडू उत्तम प्रकारे टायमिंग केला. पॉवरप्लेमध्ये त्याने सहजपणे क्षेत्ररक्षकांना चकवले आणि एकदा सेट झाल्यानंतर मोठे फटके आणि षटकार लगावण्यास सुरुवात केली. “तो पूर्णपणे नियंत्रणात दिसत होता. कोणत्या गोलंदाजाला लक्ष्य करायचे, हे त्याला माहीत होते,” असे पुजारांनी सांगितले.

कर्णधार म्हणून अशा खेळीचे महत्त्व अधोरेखित करत पुजारा म्हणाले, “जेव्हा तुम्ही संघाचे नेतृत्व करता, तेव्हा स्वतः उदाहरण निर्माण करणे गरजेचे असते. युवा खेळाडूंसमोर तुम्हाला हाच आदर्श ठेवायचा असतो.”

नमन धीरच्या गोलंदाजीचेही कौतुक

पुजारांनी भारताकडून टी-२० आंतरराष्ट्रीय पदार्पण करणाऱ्या नमन धीरच्या कामगिरीचेही कौतुक केले. धीरने प्रभावी गोलंदाजी करत ३१ धावांत ३ विकेट्स घेतल्या आणि भारताचा सर्वाधिक किफायतशीर गोलंदाज ठरला.

“नमन धीरने आपल्या क्रिकेटच्या समजुतीचा चांगला वापर केला. त्याने तीन विकेट्स घेतल्या. चेंडूवर षटकार बसल्यानंतर त्याने लाइन-लेंथमध्ये बदल केला आणि वेगातही चांगले वैविध्य आणले,” असे पुजारा म्हणाले.

पार्टटाइम गोलंदाज असला तरी केवळ साधी गोलंदाजी करून चालत नाही. त्यापेक्षा काहीतरी वेगळे करावे लागते आणि नमन धीरने आपण चांगला गोलंदाज होऊ शकतो, हे दाखवून दिले आहे, असेही पुजारांनी सांगितले.

“प्रत्येक सामन्यात त्याच्याकडून चार षटके टाकण्याची अपेक्षा करता येणार नाही. मात्र, तो सातत्याने सुधारत आहे. टी-२० क्रिकेटमध्ये तो एक चांगला गोलंदाज बनू शकतो,” असा विश्वास पुजारांनी व्यक्त केला.