अर्शदीपचा विकेट्सचा दीडशतकी धमाका!

भारतीय क्रिकेट संघाचा डावखुरा वेगवान गोलंदाज अर्शदीप सिंह याने न्यूझीलंडविरुद्धच्या चौथ्या टी-२० आंतरराष्ट्रीय सामन्यात ऐतिहासिक कामगिरी केली. ऑकलंडच्या ईडन पार्क मैदानावर झालेल्या या सामन्यात अर्शदीपने आंतरराष्ट्रीय टी-२० क्रिकेटमध्ये १५० विकेट्सचा टप्पा पूर्ण केला. अशी कामगिरी करणारा तो भारताचा पहिलाच गोलंदाज ठरला आहे.

न्यूझीलंडच्या डावातील १९व्या षटकात कर्णधार मिचेल सँटनरला बाद करत अर्शदीपने हा ऐतिहासिक टप्पा गाठला. विशेष म्हणजे, टी-२० आंतरराष्ट्रीय क्रिकेटमध्ये पदार्पण केल्यानंतर सर्वात कमी दिवसांत १५० विकेट्स पूर्ण करण्याचा विक्रमही त्याने आपल्या नावावर केला. नोव्हेंबर २०२२ मध्ये पदार्पण करणाऱ्या अर्शदीपने अवघ्या १,५७७ दिवसांत ही कामगिरी केली. यापूर्वी हा विक्रम श्रीलंकेच्या वानिंदू हसरंगाच्या नावावर होता. हसरंगाने २,३२५ दिवसांत १५० विकेट्स पूर्ण केल्या होत्या.

चेंडूंच्या बाबतीत अर्शदीप १५० विकेट्स घेणारा जगातील तिसरा वेगवान गोलंदाज ठरला आहे. त्याने २,१४३ चेंडूंमध्ये हा टप्पा गाठला. अफगाणिस्तानचा राशिद खान २,०९८ चेंडूंसह दुसऱ्या, तर हसरंगा २,०३५ चेंडूंसह पहिल्या क्रमांकावर आहे. मात्र, १५० विकेट्स घेणारा सर्वात वेगवान वेगवान गोलंदाज होण्याचा मान अर्शदीपने पटकावला आहे. त्याने बांगलादेशच्या मुस्तफिजुर रहमानला मागे टाकले.

अर्शदीपने २०२६ या वर्षात आतापर्यंत ४० विकेट्स घेत आणखी एक विक्रम नोंदवला आहे. पूर्ण सदस्य देशांच्या खेळाडूंमध्ये एका कॅलेंडर वर्षात सर्वाधिक टी-२० आंतरराष्ट्रीय विकेट्स घेण्याचा विक्रम त्याने केला. यापूर्वी आयर्लंडच्या जोश लिटलच्या नावावर २०२२ मध्ये ३९ विकेट्स घेण्याचा विक्रम होता.

अर्शदीपने आतापर्यंत १०३ टी-२० आंतरराष्ट्रीय सामन्यांत १५० विकेट्स घेतल्या आहेत. तो भारताचा या प्रकारातील सर्वाधिक बळी घेणारा गोलंदाज ठरला आहे.