फुटबॉल विश्वातील सर्वोच्च संघटना फीफाचे अध्यक्ष जियानी इन्फेंटिनो यांनी इटलीतील मिलान शहरात आंतरराष्ट्रीय क्रिकेट परिषदेचे (आयसीसी) अध्यक्ष जय शाह यांची भेट घेतली. जगातील दोन सर्वाधिक लोकप्रिय क्रीडाप्रकारांशी संबंधित पदाधिकाऱ्यांमधील ही महत्त्वपूर्ण भेट मानली जात आहे.
या भेटीची माहिती इन्फेंटिनो यांनी इंस्टाग्रामवरील पोस्टद्वारे दिली. क्रिकेटच्या विकासासाठी जय शाह यांनी केलेल्या कार्याचे त्यांनी कौतुक केले तसेच ऑलिम्पिक स्पर्धांमध्ये क्रिकेटच्या पुनरागमनाबद्दल शुभेच्छाही दिल्या.
इन्फेंटिनो यांनी आपल्या पोस्टमध्ये म्हटले आहे की, मिलानमध्ये आयसीसी अध्यक्ष जय शाह यांची भेट घेऊन त्यांना अत्यंत आनंद झाला. “क्रिकेटसारख्या सुंदर खेळाच्या प्रगतीसाठी त्यांनी केलेले काम उल्लेखनीय आहे. दोन वर्षांत क्रिकेट पुन्हा समर ऑलिम्पिकमध्ये सहभागी होत आहे. त्यासाठी त्यांना आणि संबंधित सर्वांना शुभेच्छा,” असे त्यांनी नमूद केले.
तसेच, क्रीडेमार्फत जगाला एकत्र आणण्यासाठी जय शाह यांच्यासोबत सहकार्य करण्यास आपण उत्सुक असल्याचेही त्यांनी स्पष्ट केले. “स्पोर्ट्सच्या माध्यमातून जगाला जोडण्यासाठी एकत्र काम करण्याची आणि सहकार्य करण्याची मी आतुरतेने वाट पाहत आहे,” असेही ते म्हणाले.
क्रिकेटचा समावेश २०२८ मध्ये होणाऱ्या लॉस एंजेलिस (अमेरिका) येथील ग्रीष्मकालीन ऑलिम्पिक स्पर्धेत होणार आहे. यापूर्वी १९०० साली पॅरिस ऑलिम्पिकमध्ये क्रिकेट खेळवण्यात आले होते. तब्बल १२८ वर्षांनंतर क्रिकेट ऑलिम्पिकमध्ये पुनरागमन करणार आहे.
एलए ऑलिम्पिक २०२८ मध्ये टी-२० स्वरूपात सामने खेळवले जाणार असून पुरुष आणि महिला अशा दोन्ही गटांत स्वतंत्र स्पर्धा होतील. दोन्ही गटांत सुवर्ण, रौप्य आणि कांस्य पदकांसाठी लढत होईल. महिला गटातील अंतिम सामना २० जुलैला, तर पुरुष गटातील अंतिम सामना २९ जुलैला होणार आहे.
प्रत्येक गटात सहा संघ सहभागी होतील आणि एकूण २८ सामने खेळवले जातील. पुरुष व महिला गटासाठी ९०-९० खेळाडूंचा कोटा निश्चित करण्यात आला असून प्रत्येक संघाला १५ खेळाडूंचा संघ जाहीर करता येणार आहे.
ऑलिम्पिकमधील सर्व क्रिकेट सामने लॉस एंजेलिसपासून सुमारे ५० किलोमीटर अंतरावर असलेल्या पोमोना येथील फेअरग्राउंड्समध्ये उभारण्यात येणाऱ्या तात्पुरत्या स्टेडियममध्ये खेळवले जाणार आहेत.
दरम्यान, ऑलिम्पिक २०२८ साठी क्रिकेटचे पात्रता निकष अद्याप निश्चित झालेले नाहीत. याबाबतचा निर्णय १७ जुलैपासून सिंगापूरमध्ये होणाऱ्या आयसीसीच्या वार्षिक बैठकीत होण्याची शक्यता व्यक्त केली जात आहे.
