फिफा विश्वचषक 2026 स्पर्धेच्या उपांत्य फेरीपूर्वी जर्मनीचा दिग्गज माजी गोलरक्षक ऑलिव्हर कान यांनी फ्रान्सला विश्वविजेतेपदाचा सर्वात प्रबळ दावेदार ठरवले आहे. संघातील समतोल, दर्जेदार खेळाडूंची खोली आणि कोणत्याही परिस्थितीत सामना जिंकण्याची क्षमता यामुळे फ्रान्स इतर संघांच्या तुलनेत सरस असल्याचे कान यांनी म्हटले आहे.
फ्रान्सचा उपांत्य फेरीतील सामना 15 जुलै (बुधवार) रोजी डॅलस स्टेडियमवर स्पेनविरुद्ध होणार आहे. विश्वचषकाच्या बाद फेरीत दोन्ही संघ दुसऱ्यांदा आमनेसामने येणार असून, यापूर्वी 2006 च्या राऊंड ऑफ 16 मध्ये फ्रान्सने स्पेनचा 3-1 असा पराभव केला होता.
‘जी5’शी बोलताना कान म्हणाले, “आतापर्यंतच्या कामगिरीच्या आधारे जर एखाद्या संघाची निवड करायची झाली, तर मी फ्रान्सचीच निवड करेन. संघातील संतुलन, खेळाडूंची खोली आणि वेगवेगळ्या पद्धतीने सामने जिंकण्याची क्षमता त्यांच्याकडे आहे. मात्र, उपांत्य फेरीतील चारही संघांमध्ये फारसा फरक नाही आणि त्यापैकी कोणताही संघ विश्वविजेता होऊ शकतो.”
स्पेन-फ्रान्स लढत ठरणार रणनीतीची कसोटी
कान यांच्या मते, स्पेन आणि फ्रान्स यांच्यातील सामना हा स्पर्धेतील सर्वाधिक रोमांचक रणनीतीचा सामना ठरेल. स्पेन चेंडूवर नियंत्रण ठेवत सातत्याने आक्रमण करण्यासाठी ओळखला जातो, तर फ्रान्स वेगवान प्रतिआक्रमणात जगातील सर्वात धोकादायक संघांपैकी एक आहे.
त्यांच्या मते, सामन्यात मिडफिल्डवरील वर्चस्व आणि भक्कम बचाव हीच विजयाची गुरुकिल्ली असेल. स्पेनने संयमाने खेळत जलद पासिंग करणे, योग्य भागात खेळाडूंची संख्या वाढवणे आणि बचावाची शिस्त कायम ठेवणे आवश्यक आहे.
मिडफिल्डची लढत ठरवेल निकाल
कान यांनी सांगितले की, उपांत्य फेरीसारख्या मोठ्या सामन्यांमध्ये विजय लहान-लहान क्षणांवर अवलंबून असतो. केवळ आक्रमक दबाव टाकून चालत नाही, तर योग्य वेळी प्रभावी प्रेसिंग आणि मिडफिल्डवर नियंत्रण राखणे तितकेच महत्त्वाचे असते. जो संघ प्रतिस्पर्ध्याला मिडफिल्डमधून खेळू देणार नाही, त्याच्याकडे विजयाची अधिक संधी असेल.
गोलरक्षक आता फक्त बचावपटू नाही
आधुनिक फुटबॉलमधील गोलरक्षकाच्या भूमिकेबाबत बोलताना कान म्हणाले की, आजचा गोलरक्षक हा केवळ गोल वाचवणारा खेळाडू नसून हल्ल्याची सुरुवात करणारा आणि संघाचा शेवटचा बचावपटूही असतो.
“आजचा गोलरक्षक हा पहिला आक्रमक आणि शेवटचा बचावपटू आहे. त्याचा एक योग्य निर्णय किंवा एक चूक संपूर्ण सामन्याचा निकाल बदलू शकते. सर्वोत्तम संघ दबावाखालीही शांत राहतात, आपल्या रणनीतीवर ठाम राहतात आणि योग्य निर्णय घेतात,” असे कान यांनी सांगितले.
हेही वाचा :
ब्रिटनकडून इराणची आयआरजीसी दहशतवादी संघटना घोषित
पुरुषांनी इंग्लंडमध्ये हात टेकले, महिलांनी घडवला इतिहास
वनडेत हिशोब चुकता करणार टीम इंडिया?
संरक्षण क्षेत्रात क्रांती! ‘अस्त्र’ क्षेपणास्त्र निर्मितीत खासगी कंपन्यांचा सहभाग
