फीफा विश्वचषकाच्या इतिहासात प्रथमच विजेत्या संघाला ट्रॉफी आणि सुवर्णपदकांसोबत ‘चॅम्पियनशिप रिंग’ हा अनोखा सन्मान दिला जाणार आहे. फीफा विश्वचषक २०२६ च्या विजेत्या संघातील खेळाडू आणि सपोर्ट स्टाफला ही विशेष रिंग प्रदान करण्यात येणार असल्याची अधिकृत घोषणा फीफाने केली आहे.
अमेरिकेतील व्यावसायिक क्रीडा स्पर्धांमधील ‘चॅम्पियनशिप रिंग’च्या परंपरेपासून प्रेरणा घेत ही संकल्पना प्रथमच फुटबॉल विश्वचषकात राबविण्यात येत आहे. विजेतेपदाची ऐतिहासिक आठवण कायमस्वरूपी जपण्यासाठी हा उपक्रम राबविला जात असल्याचे फीफाने स्पष्ट केले.
रिंगच्या एका बाजूला फीफा विश्वचषक ट्रॉफीची प्रतिकृती, तर दुसऱ्या बाजूला विजेत्या संघानुसार खास डिझाइन असणार आहे. प्रत्येक रिंगवर स्वतंत्र क्रमांक असेल, ती संबंधित खेळाडूसाठी सानुकूल (कस्टमाइज) करण्यात येईल आणि त्यासोबत अस्सल असल्याचे प्रमाणपत्रही दिले जाईल.
अंतिम सामना संपताच विजेत्या संघाच्या कर्णधार आणि मुख्य प्रशिक्षकाला प्रतीकात्मक रिंग प्रदान करण्यात येईल. त्यानंतर संपूर्ण विजेत्या संघासाठी ३० कस्टमाइज्ड रिंग तयार करून अधिकृतपणे वितरित केल्या जातील.
फीफाच्या माहितीनुसार, या रिंगचे एकूण २,०२६ लिमिटेड एडिशन तयार करण्यात येणार आहेत. त्यापैकी ३० रिंग विजेत्या संघासाठी, तर उर्वरित १,९९६ रिंग अधिकृत परवानाधारक उत्पादन म्हणून जगभरातील फुटबॉल चाहत्यांसाठी विक्रीस उपलब्ध असतील.
दरम्यान, विश्वचषक २०२६ च्या अंतिम सामन्यात युरोपियन विजेता स्पेन आणि विद्यमान विश्वविजेता अर्जेंटिना आमनेसामने येणार आहेत. स्पेनने उपांत्य फेरीत फ्रान्सचा पराभव करत अंतिम फेरी गाठली, तर अर्जेंटिनाने इंग्लंडवर २-१ अशी मात करून सलग दुसऱ्यांदा आणि एकूण सातव्यांदा विश्वचषकाच्या अंतिम फेरीत प्रवेश केला.
कर्णधार लिओनेल मेसी स्पर्धेत शानदार फॉर्ममध्ये असून त्याने आतापर्यंत ८ गोल केले आहेत. विश्वचषकातील त्याच्या कारकिर्दीतील एकूण गोलसंख्या आता २१ वर पोहोचली आहे. अंतिम सामन्यातही अर्जेंटिनाला मेसीकडून मोठ्या खेळीची अपेक्षा असेल.