हरमनप्रीत कौरकडे ऐतिहासिक टप्पा गाठण्याची संधी

महिला प्रीमियर लीग २०२६ मध्ये मंगळवारी नवी मुंबईतील डी.वाय. पाटील क्रीडा संकुलात मुंबई इंडियन्स आणि गुजरात जायंट्स यांच्यात सामना होणार आहे. या सामन्यात मुंबई संघाची कर्णधार हरमनप्रीत कौर हिला मोठी वैयक्तिक कामगिरी नोंदवण्याची संधी आहे.

हरमनप्रीत कौर सध्याच्या हंगामात उत्कृष्ट फॉर्ममध्ये आहे. गुजरात संघाविरुद्ध होणाऱ्या या सामन्यात तिने ५५ धावा केल्यास महिला प्रीमियर लीगमध्ये तिच्या एकूण १,००० धावा पूर्ण होतील. अशी कामगिरी करणारी ती पहिली भारतीय महिला खेळाडू ठरू शकते.

२०२३ पासून आतापर्यंत खेळलेल्या २९ सामन्यांतील २८ डावांमध्ये हरमनप्रीतने ४२.९५ च्या सरासरीने आणि १४४.९३ च्या वेगवान धावगतीने ९४५ धावा केल्या आहेत. या कालावधीत तिच्या नावावर ९ अर्धशतके असून नाबाद ९५ ही तिची सर्वोच्च धावसंख्या आहे. महिला प्रीमियर लीगमधील सर्वाधिक यशस्वी फलंदाजांच्या यादीत हरमनप्रीत सध्या चौथ्या क्रमांकावर आहे.

महिला प्रीमियर लीगमध्ये आतापर्यंत १,००० किंवा त्याहून अधिक धावा करणारी एकमेव फलंदाज म्हणजे मुंबई इंडियन्सची नेट सायव्हर-ब्रंट आहे. तिने २०२३ पासून ३१ सामन्यांच्या ३१ डावांत ९ अर्धशतकांच्या जोरावर १,१०१ धावा केल्या आहेत. ती लीगमधील आतापर्यंतची सर्वात यशस्वी फलंदाज मानली जाते आणि सध्याच्या हंगामातही मुंबई संघाचा भाग आहे.

या यादीत दुसऱ्या क्रमांकावर मेग लॅनिंग आहे. २०२३ ते २०२५ या काळात दिल्ली संघाची कर्णधार असलेली लॅनिंग सध्या उत्तर प्रदेश संघाची कर्णधार आहे. आतापर्यंत खेळलेल्या २९ सामन्यांच्या २९ डावांत तिने ९९६ धावा केल्या असून, या हंगामात तिच्याही १,००० धावा पूर्ण होण्याची शक्यता आहे.

तिसऱ्या क्रमांकावर एलिस पेरी आहे. ती सध्याच्या हंगामात सहभागी नाही. २०२३ ते २०२५ या कालावधीत तिने बंगळुरू संघाकडून २५ सामन्यांच्या २५ डावांत ९७२ धावा केल्या आहेत. नाबाद ९० ही तिची सर्वोच्च धावसंख्या आहे. ती या हंगामात खेळली असती, तर तिच्याही १,००० धावा पूर्ण होऊ शकल्या असत्या.