आशियाई क्रीडा स्पर्धेतून हर्षित राणा बाहेर; यश ठाकूरला संधी

अफगाणिस्तानविरुद्ध १३ सप्टेंबरपासून सुरू होणाऱ्या तीन सामन्यांच्या टी-२० मालिकेपूर्वी भारतीय संघाला मोठा धक्का बसला आहे. दुखापतीतून पूर्णपणे सावरू न शकल्याने वेगवान गोलंदाज हर्षित राणा अफगाणिस्तानविरुद्धच्या टी-२० मालिकेसह आशियाई क्रीडा स्पर्धा २०२६ मधूनही बाहेर पडला आहे.

हर्षित राणाच्या जागी यश ठाकूरची भारतीय संघात निवड करण्यात आली आहे. अफगाणिस्तानविरुद्धची टी-२० मालिका आणि आशियाई क्रीडा स्पर्धा या दोन्हींसाठी यशचा संघात समावेश करण्यात आला आहे. भारतीय क्रिकेट नियामक मंडळाने (बीसीसीआय) गुरुवारी सोशल मीडिया प्लॅटफॉर्म ‘एक्स’वरून ही माहिती दिली.

बीसीसीआयने दिलेल्या माहितीनुसार, हर्षितची निवड अफगाणिस्तान मालिकेसाठी त्याच्या फिटनेसवर अवलंबून होती. तो बीसीसीआयच्या सेंटर ऑफ एक्सलन्समध्ये पुनर्वसन प्रक्रियेतून जात होता आणि त्याच्या प्रकृतीत चांगली सुधारणा होत होती. मात्र, ७ सप्टेंबर रोजी मॅच सिम्युलेशनदरम्यान गोलंदाजी करताना त्याच्या मांडीच्या स्नायूंना दुखापत झाली. त्यामुळे त्याला दोन्ही स्पर्धांमधून माघार घ्यावी लागली.

यश ठाकूरचे पुनरागमन

झिम्बाब्वेविरुद्धच्या टी-२० आंतरराष्ट्रीय मालिकेतून पदार्पण करणाऱ्या यश ठाकूरने आतापर्यंत दोन टी-२० सामने खेळले असून चार विकेट्स घेतल्या आहेत. चांगली कामगिरी करूनही त्याची अफगाणिस्तानविरुद्धच्या मालिकेसाठी सुरुवातीला निवड झाली नव्हती. मात्र, हर्षितच्या दुखापतीनंतर त्याला आता दोन्ही संघांमध्ये स्थान मिळाले आहे.

दरम्यान, आशियाई क्रीडा स्पर्धा २०२६ मध्ये भारतीय संघ मजबूत दिसत आहे. या स्पर्धेचे आयोजन १९ सप्टेंबरपासून जपानमधील आयची-नागोया येथे होणार आहे. भारतीय संघ स्पर्धेतील आपला पहिला सामना २८ सप्टेंबर रोजी उपांत्यपूर्व फेरीत खेळणार आहे.

अफगाणिस्तानविरुद्ध भारतीय संघ

श्रेयस अय्यर (कर्णधार), अभिषेक शर्मा, वैभव सूर्यवंशी, संजू सॅमसन (यष्टिरक्षक), ईशान किशन (यष्टिरक्षक), तिलक वर्मा (उपकर्णधार), शिवम दुबे, नितीश कुमार रेड्डी, अक्षर पटेल, वॉशिंग्टन सुंदर, वरुण चक्रवर्ती, रवी बिश्नोई, जसप्रीत बुमराह, अर्शदीप सिंह आणि यश ठाकूर.

आशियाई क्रीडा स्पर्धेसाठी भारतीय संघ

श्रेयस अय्यर (कर्णधार), अभिषेक शर्मा, संजू सॅमसन (यष्टिरक्षक), ईशान किशन (यष्टिरक्षक), शिवम दुबे, तिलक वर्मा (उपकर्णधार), नितीश कुमार रेड्डी, अक्षर पटेल, वॉशिंग्टन सुंदर, वरुण चक्रवर्ती, रवी बिश्नोई, जसप्रीत बुमराह, अर्शदीप सिंह, वैभव सूर्यवंशी आणि यश ठाकूर.