आयपीएल २०२६ मधील ५५व्या सामन्यात सोमवारी दिल्ली कॅपिटल्सने पंजाब किंग्सवर ३ विकेट्सने रोमांचक विजय मिळवला. या सामन्यात दिल्लीचा स्टार फलंदाज केएल राहुल फक्त ९ धावा करू शकला, तरीही त्याने ऑरेंज कॅपच्या शर्यतीत मोठी झेप घेत सनरायझर्स हैदराबादच्या अभिषेक शर्माला मागे टाकले आहे.
केएल राहुलने यंदाच्या हंगामात १२ सामन्यांत तब्बल १७७ च्या स्ट्राईक रेटने ४७७ धावा केल्या आहेत. त्यामुळे तो सर्वाधिक धावा करणाऱ्या फलंदाजांच्या यादीत दुसऱ्या स्थानावर पोहोचला आहे. अभिषेक शर्मा ११ सामन्यांत ४७५ धावांसह आता तिसऱ्या क्रमांकावर घसरला आहे.
दरम्यान, सनरायझर्स हैदराबादचा विकेटकीपर-फलंदाज हेनरिक क्लासेन अजूनही ऑरेंज कॅपचा मानकरी ठरला आहे. क्लासेनने ११ सामन्यांत १५७ च्या स्ट्राईक रेटने ४९४ धावा करत अव्वल स्थान कायम राखले आहे.
गुजरात टायटन्सचा कर्णधार शुभमन गिल १० सामन्यांत ४६२ धावांसह चौथ्या स्थानावर आहे. त्याचा सलामी जोडीदार साई सुदर्शन ११ सामन्यांत ४४० धावांसह पाचव्या क्रमांकावर आहे. तर युवा फलंदाज वैभव सूर्यवंशीनेही ११ सामन्यांत ४४० धावा करत सहाव्या स्थानावर आपली उपस्थिती मजबूत केली आहे.
पर्पल कॅपवर भुवनेश्वरचा कब्जा
गोलंदाजांमध्ये रॉयल चॅलेंजर्स बंगळुरूचा अनुभवी वेगवान गोलंदाज भुवनेश्वर कुमार याने पर्पल कॅपवर आपली पकड मजबूत केली आहे. भुवनेश्वरने ११ सामन्यांत २१ विकेट्स घेत पहिल्या स्थानावर कब्जा केला आहे.
अंशुल कंबोज १९ विकेट्ससह दुसऱ्या क्रमांकावर आहे. गुजरात टायटन्सचा वेगवान गोलंदाज कगिसो रबाडा १८ विकेट्ससह तिसऱ्या स्थानी कायम आहे.
लखनौ सुपर जायंट्सचा प्रिन्स यादव १६ विकेट्ससह चौथ्या स्थानावर आहे. ईशान मलिंगा १६ विकेट्स घेत पाचव्या क्रमांकावर असून राशिद खान १५ विकेट्ससह सहाव्या स्थानी आहे. राजस्थान रॉयल्सचा जोफ्रा आर्चर १५ विकेट्ससह सातव्या स्थानावर पोहोचला आहे.
