इंग्लंडचा युवा स्टार जूड बेलिंघम आज जगातील सर्वोत्तम मिडफिल्डर्सपैकी एक मानला जातो. मैदानावरील त्याची आक्रमकता, अचूक पासिंग, ड्रिब्लिंग आणि नेतृत्वगुण यामुळे तो फुटबॉल जगतात वेगळी ओळख निर्माण करत आहे. अवघ्या कमी वयात जूडने जे यश मिळवलं, त्यामुळे त्याच्या सन्मानार्थ त्याच्या माजी क्लबने ‘२२ नंबर’ची जर्सीच रिटायर केली होती.
फुटबॉल घरातूनच वारसा
२९ जून २००३ रोजी युनायटेड किंगडममधील स्टॉरब्रिज येथे जूड विक्टर विलियम बेलिंघमचा जन्म झाला. त्याचे वडील मार्क बेलिंघम हे अर्ध-व्यावसायिक फुटबॉलपटू होते. त्यामुळे लहानपणापासूनच जूडला फुटबॉलचं वेड लागलं. त्याचा धाकटा भाऊ जोबे बेलिंघम हाही फुटबॉलमध्ये करिअर करत आहे.
जूडने प्रायर स्कूलमध्ये शिक्षण घेतलं. शाळेच्या मैदानावरच त्याने आपल्या कौशल्याला धार दिली. जिनेदिन झिदान, वेन रूनी आणि स्टीव्हन जेरार्ड हे त्याचे आदर्श खेळाडू होते. शिक्षणासोबतच फुटबॉलवर त्याने पूर्ण लक्ष केंद्रित केलं.
१४व्या वर्षी अंडर-१८ संघात स्थान
२००९ मध्ये जूड स्टॉरब्रिज ज्युनियर्स क्लबमध्ये दाखल झाला. त्यानंतर बर्मिंघम सिटीच्या अंडर-८ संघात त्याची निवड झाली. त्याच्या जबरदस्त कामगिरीमुळे अवघ्या १४व्या वर्षी त्याला अंडर-१८ संघात स्थान मिळालं. १६ वर्ष पूर्ण होण्यापूर्वीच तो अंडर-२३ संघात पोहोचला होता.
बर्मिंघमचा सर्वात युवा खेळाडू
जूड बेलिंघमने फक्त १६ वर्षे आणि ३८ दिवसांच्या वयात बर्मिंघम सिटीसाठी पदार्पण करत क्लबच्या इतिहासातील सर्वात युवा खेळाडू होण्याचा विक्रम केला. त्याने सर्वात युवा गोलस्कोररचा विक्रमही आपल्या नावावर केला.
२०१९-२० हंगामात त्याच्या शानदार खेळामुळे त्याला ‘ईए स्पोर्ट्स यंग प्लेयर ऑफ द सीझन’ आणि ‘चॅम्पियनशिप अप्रेंटिस ऑफ द इयर’ पुरस्कार मिळाले.
डॉर्टमुंडमध्ये मोठी झेप
जूडच्या प्रतिभेने युरोपमधील मोठ्या क्लब्सचं लक्ष वेधलं. अखेर २०२० मध्ये जर्मन क्लब बोरुसिया डॉर्टमुंडने त्याला तब्बल २५ मिलियन पाउंडमध्ये साइन केलं. डॉर्टमुंडकडून खेळताना त्याने १३२ सामन्यांत २४ गोल आणि २५ असिस्ट केले. त्याने संघाला जर्मन कप जिंकून देण्यातही महत्त्वाची भूमिका बजावली.
‘२२ नंबर’ जर्सी रिटायर
विशेष म्हणजे मॅंचेस्टर युनायटेडसारख्या मोठ्या क्लबऐवजी जूडने डॉर्टमुंडची निवड केली. त्याच्या या योगदानाचा सन्मान म्हणून बर्मिंघम सिटी क्लबने त्याची ‘२२ नंबर’ जर्सी कायमची रिटायर केली. एवढ्या कमी वयात मिळालेला हा सन्मान खूप मोठा मानला जातो.
इंग्लंडचा विश्वासू स्टार
१२ नोव्हेंबर २०२० रोजी जूडने आयर्लंडविरुद्धच्या सामन्यात इंग्लंडच्या वरिष्ठ संघासाठी पदार्पण केलं. त्यानंतर तो युरो कप आणि फिफा वर्ल्ड कपमध्ये इंग्लंडसाठी महत्त्वाचा खेळाडू ठरला.
मिडफिल्डमध्ये आक्रमण आणि बचाव यांचं अप्रतिम संतुलन साधणारा जूड बेलिंघम आज इंग्लंड संघाचा कणा मानला जातो. मोठ्या सामन्यांमध्ये दबावाखाली उत्कृष्ट कामगिरी करण्याची त्याची क्षमता त्याला इतरांपेक्षा वेगळं ठरवते.
अवघ्या २२व्या वर्षीच जूड बेलिंघमने फुटबॉल विश्वात आपलं वेगळं स्थान निर्माण केलं असून भविष्यात तो आणखी मोठे विक्रम करेल, अशी अपेक्षा व्यक्त केली जात आहे.
