चार वर्षांनंतर ॲलन-फर्ग्युसनचे न्यूझीलंडच्या वनडे संघात पुनरागमन!

भारताविरुद्ध ४ नोव्हेंबरपासून सुरू होणाऱ्या पाच सामन्यांच्या एकदिवसीय मालिकेसाठी न्यूझीलंड क्रिकेटने संघ जाहीर केला आहे. फिन ॲलन, लॉकी फर्ग्युसन, रचिन रवींद्र आणि टिम सीफर्ट यांना संघात स्थान देण्यात आले आहे. विशेष म्हणजे, फिन ॲलन आणि लॉकी फर्ग्युसन यांनी न्यूझीलंडकडून अखेरचा एकदिवसीय सामना २०२३ मध्ये खेळला होता. त्यामुळे त्यांच्या पुनरागमनाकडे क्रिकेट चाहत्यांचे लक्ष लागले आहे. मिचेल सँटनरकडे संघाचे नेतृत्व सोपवण्यात आले आहे.

या मालिकेसाठी न्यूझीलंडने दोन स्वतंत्र संघ जाहीर केले आहेत. पहिल्या तीन सामन्यांसाठी निवडलेले काही खेळाडू त्यानंतर भारताविरुद्धच्या कसोटी मालिकेच्या तयारीसाठी संघातून बाहेर पडतील. मिचेल सँटनर, मायकेल ब्रेसवेल, मार्क चॅपमन, जेकब डफी, विल यंग आणि ब्लेअर टिकनर हे पाचही एकदिवसीय सामने खेळण्यासाठी उपलब्ध असतील.

खांद्याच्या दुखापतीमुळे भारताविरुद्धच्या टी-२० मालिकेला मुकलेल्या रचिन रवींद्रला पहिल्या तीन एकदिवसीय सामन्यांसाठी संघात स्थान देण्यात आले आहे. फिन ॲलन आणि टिम सीफर्ट यांचा समावेश अखेरच्या दोन सामन्यांसाठी करण्यात आला आहे. सीफर्टने न्यूझीलंडकडून अखेरचा ५० षटकांचा सामना सुमारे १८ महिन्यांपूर्वी पाकिस्तानविरुद्ध खेळला होता.

२०२७ च्या विश्वचषकासाठी महत्त्वाची मालिका

२०२७ मध्ये दक्षिण आफ्रिका, नामिबिया आणि झिम्बाब्वे येथे होणाऱ्या एकदिवसीय विश्वचषकाच्या पार्श्वभूमीवर ही मालिका दोन्ही संघांसाठी महत्त्वाची ठरणार आहे. न्यूझीलंडचे प्रशिक्षक रॉब वॉल्टर यांनी भारताविरुद्धच्या मालिकेला मोठे महत्त्व असल्याचे सांगितले.

भारतीय संघासारख्या बलाढ्य प्रतिस्पर्ध्याविरुद्ध घरच्या मैदानावर खेळण्याची संधी ही विश्वचषकाच्या तयारीसाठी उपयुक्त ठरेल, असे वॉल्टर यांनी स्पष्ट केले. अखेरच्या दोन सामन्यांसाठी सात खेळाडूंचा समावेश केल्यामुळे संघातील पर्यायी खेळाडूंची क्षमता तपासता येईल, असेही त्यांनी नमूद केले.

दरम्यान, दुखापतींमुळे जॅक फॉल्क्स, विल ओ’रुर्क आणि बेन सिअर्स यांची निवड करण्यात आलेली नाही. भारत आणि न्यूझीलंड यांच्यातील पाच एकदिवसीय सामने ऑकलंड, वेलिंग्टन, हॅमिल्टन आणि माउंट माउंगानुई येथे खेळवले जाणार आहेत. या मालिकेनंतर १९ नोव्हेंबरपासून बेसिन रिझर्व्ह येथे पहिला कसोटी सामना होणार आहे.

पहिल्या तीन वनडे सामन्यांसाठी न्यूझीलंडचा संघ

मिचेल सँटनर (कर्णधार), मायकेल ब्रेसवेल, मार्क चॅपमन, डेव्हॉन कॉनवे, जेकब डफी, मॅट हेन्री, काइल जेमिसन, टॉम लॅथम (यष्टिरक्षक), डॅरिल मिचेल, ग्लेन फिलिप्स, रचिन रवींद्र, नॅथन स्मिथ, ब्लेअर टिकनर आणि विल यंग.

चौथ्या आणि पाचव्या वनडेसाठी न्यूझीलंडचा संघ

मिचेल सँटनर (कर्णधार), फिन ॲलन, मायकेल ब्रेसवेल, मार्क चॅपमन, क्रिस्टियन क्लार्क, जेकब डफी, मॅट फिशर, मिच हे (यष्टिरक्षक), टिम सीफर्ट (यष्टिरक्षक), निक केली, ब्लेअर टिकनर आणि विल यंग.