दुसऱ्या कसोटीतही पडिक्कलचे शतक

श्रीलंकेविरुद्ध सिंहलीज स्पोर्ट्स क्लब मैदानावर सुरू असलेल्या दुसऱ्या कसोटी सामन्याच्या पहिल्या दिवशी भारतीय संघाने शानदार फलंदाजी केली. देवदत्त पडिक्कलच्या शतकी खेळीच्या जोरावर भारताने दिवसअखेर ८५ षटकांत ५ विकेट गमावत ३०० धावा केल्या आहेत.

नाणेफेक जिंकून प्रथम फलंदाजी करण्यासाठी उतरलेल्या भारतीय संघाकडून सलामीवीर यशस्वी जैस्वाल आणि केएल राहुल यांनी ३७ धावांची भागीदारी केली. केएल राहुल ३३ चेंडूंमध्ये ३ चौकारांसह १८ धावा करून बाद झाला.

त्यानंतर देवदत्त पडिक्कलने डावाची सूत्रे हाती घेतली. त्याने जैस्वालसोबत दुसऱ्या विकेटसाठी २९ धावांची भागीदारी करत संघाची धावसंख्या ६६ पर्यंत नेली. जैस्वाल अर्धशतकापासून अवघ्या ५ धावा दूर राहिला. त्याने ५३ चेंडूंमध्ये ९ चौकारांसह ४५ धावांची खेळी केली.

हे ही वाचा:

राहुल गांधींनी आता महिला आरक्षण विधेयकाला पाठींबा द्यावा!

न्यूयॉर्कमध्ये पिझ्झा डिलिव्हरी करणाऱ्या पंजाबच्या तरुणाची गोळ्या झाडून हत्या

तमिळनाडू एक्स्प्रेसमध्ये सापडले मृतदेहाचे तुकडे

जयपूरमध्ये पाद्रीवर ईडीची छापेमारी; धार्मिक परिवर्तनासाठी निधी वापरला

यानंतर कर्णधार शुभमन गिलने पडिक्कलसोबत तिसऱ्या विकेटसाठी १२० धावांची महत्त्वपूर्ण भागीदारी केली आणि भारताला १८६ धावांपर्यंत पोहोचवले. गिलने १०८ चेंडूंचा सामना करत ६ चौकारांच्या मदतीने ५० धावा केल्या.

ऋषभ पंत पाचव्या क्रमांकावर फलंदाजीसाठी उतरला, मात्र तो केवळ ३ धावा करू शकला. डावाच्या ५८व्या षटकातील पहिल्याच चेंडूवर लाहिरू कुमाराच्या गोलंदाजीचा चेंडू त्याच्या डाव्या हाताच्या मनगटावर लागला. तीव्र वेदनांमुळे पंतला मैदान सोडावे लागले. त्यावेळी भारतीय यष्टिरक्षक-फलंदाजाने केवळ १५ चेंडूंचा सामना केला होता.

पंतच्या जागी रवींद्र जडेजा फलंदाजीसाठी मैदानात उतरला. त्याने पडिक्कलसोबत ७४ धावांची भागीदारी केली. पडिक्कल १९३ चेंडूंमध्ये १२ चौकारांसह ११७ धावा करून बाद झाला. विशेष म्हणजे, मागील सामन्यातही पडिक्कलने १६७ धावांची शानदार शतकी खेळी केली होती. त्यामुळे त्याने सलग दुसऱ्या कसोटीत शतक झळकावले.

भारताला २९६ धावांवर चौथा धक्का बसला. त्यानंतर संघाच्या धावसंख्येत केवळ १५ धावांची भर पडली असताना जडेजाही बाद झाला. त्याने भारतीय संघासाठी ४३ धावांचे योगदान दिले. दिवसाचा खेळ संपला तेव्हा ध्रुव जुरेल ७ धावांवर, तर सारांश जैन ४ धावांवर नाबाद होते.

श्रीलंकेकडून असिथा फर्नांडोने ४६ धावा देत ३ बळी घेतले. तर लाहिरू कुमारा आणि केशरा नुवांथा यांनी प्रत्येकी एक विकेट घेतली.