महिला हॉकी विश्वचषक : नेदरलँड्स- अर्जेंटिनामध्ये रंगणार महामुकाबला

एफआयएच महिला हॉकी विश्वचषकाच्या अंतिम सामन्यात शनिवारी गतविजेता नेदरलँड्स आणि अर्जेंटिना आमनेसामने येणार आहेत. दोन्ही संघांनी उपांत्य फेरीत १-० अशा समान फरकाने विजय मिळवत अंतिम फेरी गाठली आहे. विशेष म्हणजे हा सामना २०२२ च्या विश्वचषकाच्या अंतिम सामन्याची पुनरावृत्ती ठरणार आहे. त्या वेळी नेदरलँड्सने अर्जेंटिनाचा पराभव करत विजेतेपद पटकावले होते.

अंतिम फेरीत नेदरलँड्सचा सलग आठव्यांदा प्रवेश

यजमान नेदरलँड्सने पहिल्या उपांत्य सामन्यात सहयजमान बेल्जियमचा १-० असा पराभव केला. बेल्जियमने सुरुवातीपासून आक्रमक खेळ करत नेदरलँड्सला चांगली झुंज दिली. मात्र, मध्यंतराच्या काही क्षण आधी नेदरलँड्सने प्रतिआक्रमण करत आघाडी मिळवली.

२८व्या मिनिटाला फ्रेडरिक माटलाने शानदार बिल्ड-अपने मिळालेल्या संधीचे गोलमध्ये रूपांतर केले. तिने एका हाताने केलेल्या डिफ्लेक्शनवर नेदरलँड्सला १-० अशी आघाडी मिळवून दिली. मध्यंतराला अवघे ९ सेकंद बाकी असताना बेल्जियमला पेनल्टी कॉर्नर मिळाला; मात्र त्यांना गोल करता आला नाही.

दुसऱ्या सत्रात बेल्जियमने बरोबरीसाठी जोरदार प्रयत्न केले. सामन्याच्या अखेरीस १८ वर्षीय फामके व्हॅन हीलने गोल करत बरोबरी साधल्याचे दिसत होते. मात्र, व्हिडिओ रिव्ह्यूनंतर हा गोल रद्द करण्यात आला. अखेर नेदरलँड्सने १-० असा विजय मिळवत सलग आठव्यांदा विश्वचषकाच्या अंतिम फेरीत प्रवेश केला.

अर्जेंटिनाचा ऑस्ट्रेलियावर निसटता विजय

दुसऱ्या उपांत्य सामन्यात अर्जेंटिनाने ऑस्ट्रेलियाचा १-० असा पराभव केला. पहिल्या सत्रात दोन्ही संघांमध्ये चुरशीची लढत झाली. दोन्ही संघांनी प्रतिस्पर्ध्याच्या सर्कलमध्ये ५-५ वेळा प्रवेश केला, तर दोन्ही संघांना प्रत्येकी १ पेनल्टी कॉर्नर मिळाला.

तिसऱ्या क्वार्टरमध्ये अर्जेंटिनाने आक्रमक खेळ केला. मात्र, ऑस्ट्रेलियाच्या गोलरक्षकाविरुद्धच्या प्रयत्नांना यश आले नाही. दुसरीकडे, अर्जेंटिनाची गोलरक्षक क्रिस्टिना कोसेंटिनो हिने शानदार बचाव करत ऑस्ट्रेलियाला आघाडी घेण्यापासून रोखले.

सामन्याचा निर्णायक क्षण ४७व्या मिनिटाला आला. पेनल्टी कॉर्नरवरील अप्रतिम रणनीतीचा फायदा घेत ज्युलिएटा जंकुनासने गोल करत अर्जेंटिनाला १-० अशी आघाडी मिळवून दिली. अखेरपर्यंत ऑस्ट्रेलियाने बरोबरीसाठी प्रयत्न केले. सामना संपण्यास अवघे १७ सेकंद बाकी असताना ऑस्ट्रेलियाला गोलची संधी मिळाली; मात्र अर्जेंटिनाने ती रोखत विजयावर शिक्कामोर्तब केले.

या विजयासह अर्जेंटिनाने सातव्यांदा विश्वचषकाच्या अंतिम फेरीत प्रवेश केला आहे.

स्पेनला सातवे स्थान

दरम्यान, स्पेनने चीनचा शूटआउटमध्ये पराभव करत स्पर्धेत सातवे स्थान मिळवले. निर्धारित वेळेत सामना १-१ असा बरोबरीत राहिला. शूटआउटमध्ये दोन्ही संघांकडून अनेक प्रयत्न अपयशी ठरले. अखेर स्पेनने १-० असा विजय मिळवला.

इंग्लंड नवव्या, जपान अकराव्या स्थानी

इंग्लंडने अमेरिकेचा ३-१ असा पराभव करत स्पर्धेत नववे स्थान पटकावले. विशेष म्हणजे सामन्यातील चारही गोल पेनल्टी कॉर्नरवर झाले.

दुसरीकडे, जपानने स्कॉटलंडवर २-१ असा विजय मिळवत अकरावे स्थान मिळवले. जपानने अखेरच्या क्षणी स्कॉटलंडचा बरोबरीचा प्रयत्न हाणून पाडला.

आता सर्वांचे लक्ष नेदरलँड्स आणि अर्जेंटिना यांच्यातील अंतिम सामन्याकडे लागले असून, यजमान नेदरलँड्स सलग चौथे विश्वविजेतेपद पटकावणार की अर्जेंटिना पुन्हा एकदा जगज्जेता ठरणार, याची उत्सुकता शिगेला पोहोचली आहे.