नंबर-३ साठी टीम इंडियात महासंग्राम!

भारत आणि श्रीलंका यांच्यातील गाले कसोटीत देवदत्त पडिक्कलने झळकावलेल्या दमदार शतकामुळे भारतीय संघाच्या निवडीसमोर नवा पेच निर्माण झाला आहे. पडिक्कलच्या या शानदार खेळीने तिसऱ्या क्रमांकावर खेळणाऱ्या साई सुदर्शनवरील दबाव वाढल्याचे मत भारताचा माजी क्रिकेटपटू आणि समालोचक आकाश चोप्राने व्यक्त केले आहे.

आकाश चोप्राने आपल्या यूट्यूब चॅनेलवर बोलताना थेट सुदर्शनच्या स्थानावर प्रश्नचिन्ह उपस्थित केले. तो म्हणाला, “आता दबाव साई सुदर्शनवर असेल. सुदर्शनला संधी मिळत आहेत, मात्र तो अद्याप संघातील आपले स्थान पक्के करू शकलेला नाही. पडिक्कलचा पहिला सामना शानदार झाला आहे. दुसऱ्या कसोटीतही त्याने दमदार कामगिरी केली, तर निवड समितीसमोर मोठा आणि मनोरंजक निर्णय घ्यावा लागू शकतो.”

पडिक्कलची कामगिरी अशीच सुरू राहिली, तर परदेशातील मालिकांमध्येही त्याला संघाबाहेर ठेवणे निवडकर्त्यांसाठी कठीण होईल, असे चोप्राने म्हटले.

“न्यूझीलंड दौऱ्यावरही केवळ दोन कसोटी सामने आहेत. अशावेळी तुम्ही साई सुदर्शनकडे पाहणार की देवदत्त पडिक्कलमध्ये गुंतवणूक करणार? कारण पडिक्कलने सध्या स्वतःला अशा खेळाडूच्या रूपात सिद्ध केले आहे, ज्याला संघातून वगळणे खूप कठीण ठरेल,” असे आकाश चोप्राने स्पष्ट केले.

पडिक्कलची विक्रमी खेळी

गाले कसोटीत पडिक्कलने तब्बल २३० चेंडूंत १६७ धावांची झंझावाती खेळी केली. त्याच्या या खेळीत १५ चौकार आणि १ षटकार होता.

पडिक्कलने के. एल. राहुलसोबत दुसऱ्या विकेटसाठी १६२ धावांची महत्त्वपूर्ण भागीदारी केली. त्यानंतर ऋषभ पंतसोबत ७१ धावांची भागीदारी करत भारताची धावसंख्या आणखी मजबूत केली.

पडिक्कलच्या शतकाच्या जोरावर भारताने दुसऱ्या दिवसाचा खेळ संपेपर्यंत ९ बाद ४६० धावा केल्या.

द्रविड-पुजारांच्या पंक्तीत पडिक्कल

श्रीलंकेविरुद्ध कसोटी क्रिकेटमध्ये भारतासाठी तिसऱ्या क्रमांकावर फलंदाजी करताना १५० किंवा त्याहून अधिक धावा करणारा पडिक्कल हा केवळ तिसरा भारतीय फलंदाज ठरला आहे.

याआधी हा पराक्रम राहुल द्रविड आणि चेतेश्वर पुजारा यांनी केला होता.

पडिक्कलच्या या धमाकेदार खेळीमुळे आता साई सुदर्शनसमोर आपले स्थान टिकवण्याचे मोठे आव्हान उभे राहिले आहे. एका बाजूला सुदर्शनला मिळालेल्या संधींचे सातत्यपूर्ण रूपांतर करावे लागणार आहे, तर दुसऱ्या बाजूला पडिक्कलने आपल्या कामगिरीतून निवडकर्त्यांसमोर “मला बाहेर ठेवणे कठीण आहे” असा स्पष्ट संदेश दिला आहे.

आता पुढच्या कसोटीत निवड समिती सुदर्शनवर विश्वास ठेवणार की पडिक्कलच्या फॉर्मला पसंती देणार, याकडे क्रिकेटविश्वाचे लक्ष लागले आहे.