मी विकेट घेणारा गोलंदाज आहे!

दलीप ट्रॉफी २०२६ मध्ये ईस्ट झोनकडून खेळताना वैभव सूर्यवंशीने आपल्या गोलंदाजीनेही छाप पाडली. अवघ्या ३ षटकांच्या स्पेलमध्ये २ बळी घेत वैभवने सामन्यात महत्त्वपूर्ण योगदान दिले. विशेष म्हणजे, त्याने एकाच षटकात २ बळी घेतले.

बीसीसीआय डोमेस्टिकने ‘एक्स’वर शेअर केलेल्या व्हिडिओमध्ये वैभवने आपल्या गोलंदाजीबद्दल मजेशीर किस्सा सांगितला.

“कोणत्याही फलंदाजाला विचारा, त्याला गोलंदाजी करायला नेहमीच मजा येते. त्याचप्रमाणे गोलंदाजालाही फलंदाजी करायला तितकीच मजा येते,” असे वैभव म्हणाला.

‘ईशान भैय्याला माहीत नव्हतं, मी विकेट-टेकर आहे!’

सामन्यात प्रतिस्पर्धी संघाच्या विकेट्स पडत नसल्याने वैभवला २ ते ३ षटके गोलंदाजी करण्यास सांगण्यात आले. त्यावेळी कर्णधार ईशान किशनला आपण जोखीम घेत असल्याचे वाटले होते.

याबाबत वैभव म्हणाला, “दुसऱ्या संघाच्या विकेट पडत नव्हत्या, त्यामुळे मला २-३ षटके गोलंदाजी करण्यास सांगितले. ईशान भैय्याला वाटले की तो रिस्क घेत आहे; पण त्याला माहीत नव्हते की मी विकेट-टेकर आहे.”

वैभवने मिळालेल्या संधीचे सोने केले आणि फक्त ३ षटकांत २ बळी घेतले.

‘फक्त तीन षटके मिळणार होती, त्यामुळे…’

गोलंदाजी करताना आपल्या डोक्यात काय विचार होता, हेही वैभवने सांगितले.

“माझ्या मनात एकच गोष्ट होती. मी पाच विकेट्स घेतल्या तरी मला फक्त तीनच षटके गोलंदाजी करायला मिळणार होती. त्यामुळे शक्य तितकी चांगली गोलंदाजी करायची, एका ठिकाणी लक्ष्य केंद्रित करायचे आणि आपला स्पेल चांगला पूर्ण करायचा, अशी माझी योजना होती,” असे त्याने सांगितले.

फलंदाज म्हणून वैभवला या सामन्यात विशेष कामगिरी करता आली नाही. मात्र, गोलंदाज म्हणून योगदान देता आल्याने तो आनंदी होता.

“फलंदाजी चांगली झाली नाही. त्यामुळे चेंडूने योगदान देता आले, हे खूप चांगले वाटले. एखादा फलंदाज विकेट घेतो, त्यापेक्षा मजेदार गोष्ट काहीच नाही,” असे वैभवने म्हटले.

ईस्ट झोनची उपांत्य फेरीत धडक

वैभव सूर्यवंशीचा ईस्ट झोन संघ रेड-बॉल स्पर्धेच्या उपांत्य फेरीत पोहोचला आहे. बंगळुरूतील बीसीसीआय सेंटर ऑफ एक्सलन्स ग्राउंड-२ येथे होणाऱ्या दुसऱ्या उपांत्य सामन्यात ईस्ट झोनचा सामना साऊथ झोनशी होणार आहे.

हा सामना रविवारी सकाळी ९.३० वाजता सुरू होईल. दलीप ट्रॉफीचा अंतिम सामना ६ सप्टेंबरपासून खेळवला जाणार आहे.