कांगारू उडाले, लंका जळाली… झिम्बाब्वेचा धिंगाणा सुरुच!

टी२० वर्ल्ड कप २०२६ मध्ये झिम्बाब्वेने आणखी एक मोठा उलटफेर करत श्रीलंकेचा ६ विकेट्सनी पराभव केला. आर. प्रेमदासा स्टेडियमवर झालेल्या या सामन्यात झिम्बाब्वेने १९.३ षटकांत लक्ष्य गाठत दणदणीत विजय मिळवला.

ग्रुप टप्प्यात झिम्बाब्वेने ४ पैकी ३ सामने जिंकले, तर १ सामना पावसामुळे रद्द झाला. यापूर्वी त्यांनी ओमानला ८ विकेट्सनी हरवले होते, तर ऑस्ट्रेलियावर २३ धावांनी मात करत मोठा धक्का दिला होता.

टॉस जिंकून प्रथम फलंदाजी करताना श्रीलंकेने ७ विकेट्स गमावत १७८ धावा केल्या. कुसल परेरा आणि पथुम निसांका यांनी ५ षटकांत ५४ धावांची दमदार भागीदारी करत संघाला वेगवान सुरुवात करून दिली. निसांकाने ४१ चेंडूत ८ चौकारांसह ६२ धावा केल्या, तर पवन रत्नायकेने २५ चेंडूत ४४ धावांची महत्त्वाची खेळी साकारली.

झिम्बाब्वेकडून ब्लेसिंग मुजारबानी, ब्रॅड इव्हान्स आणि ग्रीम क्रेमर यांनी प्रत्येकी २ विकेट्स घेतल्या.

१७९ धावांच्या आव्हानाचा पाठलाग करताना ब्रायन बेनेट आणि तदिवानाशे मारुमानी यांनी ८.३ षटकांत ६९ धावांची सलामी भागीदारी केली. बेनेटने ४८ चेंडूत ८ चौकारांसह नाबाद ६३ धावा ठोकत संघाला विजय मिळवून दिला. कर्णधार सिकंदर रझाने २६ चेंडूत ४ षटकार आणि २ चौकारांसह ४५ धावांचे योगदान दिले.

या विजयासह झिम्बाब्वेने सुपर-८ मध्ये दमदार प्रवेश केला असून त्यांचा आत्मविश्वास सध्या शिगेला पोहोचला आहे. वर्ल्ड कपमध्ये झिम्बाब्वेचा धडाका पाहता आता पुढचा धक्का कोणाला बसणार, याचीच चर्चा रंगू लागली आहे.