पश्चिम बंगालमध्ये विधानसभा निवडणुकीच्या दुसऱ्या आणि अंतिम टप्प्यापूर्वी प्रशासनात मोठे बदल करण्यात आले आहेत. भारत निवडणूक आयोगाने दक्षिण २४ परगणा जिल्ह्यातील फाल्टा ब्लॉकचे संयुक्त ब्लॉक विकास अधिकारी (BDO) सौरव हाजरा यांची तत्काळ बदली केली आहे. सत्ताधारी तृणमूल काँग्रेस (TMC)ने विशेष पोलिस निरीक्षक अजय पाल शर्मा यांच्या कारवाईविरोधात आक्षेप घेतल्यानंतर हा निर्णय घेण्यात आला.
निवडणूक आयोगाच्या अधिकाऱ्यांनुसार, सौरव हाजरा यांची फाल्टा येथून बदली करून त्यांची नियुक्ती पुरुलिया येथे करण्यात आली आहे. त्यांच्या जागी राम्या भट्टाचार्य यांची नियुक्ती करण्यात आली आहे. हा नियमित प्रशासकीय निर्णय असल्याचे सांगितले असले तरी २९ एप्रिल रोजी २४५ जागांसाठी मतदान होणार असल्याने याचे राजकीय महत्त्व वाढले आहे. याशिवाय, आयोगाने दक्षिण २४ परगणा येथील अतिरिक्त जिल्हाधिकारी (ADM) भास्कर पाल आणि बीरभूम येथील ADM सौविक भट्टाचार्य यांना निवडणुकीसंबंधित सर्व जबाबदाऱ्यांमधून हटवले आहे. मात्र, यामागील कारण स्पष्ट करण्यात आलेले नाही.
सौरव हाजरा यांचा बदली आदेश अशा वेळी देण्यात आला आहे, जेव्हा पश्चिम बंगालमध्ये दुसऱ्या टप्प्यातील १४२ जागांसाठी मतदान होत आहे. हाजरा यांच्यावर निवडणूक आयोगाने नियुक्त केलेल्या पोलिस निरीक्षक अजय पाल शर्मा यांना सहकार्य न केल्याचा आरोप आहे. शर्मा यांना सोमवारी रात्री तृणमूल उमेदवार जहांगीर खान यांच्या घरी भेट देताना पक्ष कार्यकर्त्यांच्या विरोधाला सामोरे जावे लागले. अजय पाल शर्मा हे प्रयागराजमध्ये त्यांच्या कठोर कार्यपद्धतीमुळे ‘सिंघम’ म्हणून ओळखले जातात. निवडणुकीपूर्वी त्यांनी मतदारांना धमकावणाऱ्यांना कडक इशारा दिल्याचा व्हिडिओही व्हायरल झाला होता.
हे ही वाचा:
नाशिक कॉर्पोरेट जिहाद प्रकरणातील निदा खानचे मालेगाव आणि मलेशियाशी संबंध
मंगळुरू कुकर ब्लास्ट प्रकरणात मोहम्मद शारिकला १० वर्षांची शिक्षा
यूएईने OPEC सोडल्याने भारताला काय फायदा?
अल्पवयीन मुलांवर हल्ला, विनयभंग प्रकरणी काँग्रेस पदाधिकाऱ्याला अटक
मंगळवार (२८ एप्रिल) रोजी परिस्थिती अधिक तणावपूर्ण झाली, जेव्हा शर्मा यांनी संवेदनशील भागात रूट मार्च काढून संभाव्य गोंधळ घालणाऱ्यांविरोधात शोधमोहीम राबवली. यावेळी तृणमूल समर्थकांनी त्यांच्या विरोधात निदर्शने करत ‘गो बॅक’ आणि ‘जय बांग्ला’ अशी घोषणाबाजी केली. फाल्टा विधानसभा मतदारसंघ डायमंड हार्बर लोकसभा क्षेत्रात येतो, ज्याचे प्रतिनिधित्व तृणमूलचे वरिष्ठ नेते अभिषेक बॅनर्जी करतात. हा भाग संवेदनशील मानला जात असून निष्पक्ष मतदानासाठी येथे मोठ्या प्रमाणावर केंद्रीय सुरक्षा दलांची तैनाती करण्यात आली आहे. तृणमूलने अजय पाल शर्मा यांच्यावर अधिकारांच्या पलीकडे जाऊन कारवाई केल्याचा आणि पक्ष कार्यकर्त्यांना धमकावल्याचा आरोप केला आहे. दुसरीकडे, एका व्हिडिओमध्ये शर्मा संभाव्य उपद्रवींना कडक कारवाईचा इशारा देताना दिसत आहेत.
