महिला वनडे विश्वचषक जिंकल्यानंतर भारतीय महिला क्रिकेट संघाच्या बॅकस्टाफमध्ये पहिल्यांदाच परदेशी स्ट्रेंथ अँड कंडिशनिंग कोच नेमण्याची शक्यता आहे.
२ नोव्हेंबर रोजी नवी मुंबईत झालेल्या अंतिम सामन्यात भारताने दक्षिण आफ्रिकेवर ५२ धावांनी विजय मिळवत विजेतेपद पटकावले होते. आता हरमनप्रीत कौरच्या नेतृत्वाखालील भारतीय महिला संघ डिसेंबरमध्ये बांगलादेशविरुद्ध घरच्या मैदानावर मर्यादित षटकांच्या मालिकेत उतरतील.
भारतीय क्रिकेट नियामक मंडळाने (बीसीसीआय) यंदाच्या एप्रिल महिन्यात महिला संघासाठी हेड फिजिओथेरपिस्ट आणि स्ट्रेंथ अँड कंडिशनिंग कोच पदांसाठी अर्ज मागवले होते. त्यानंतर लगेचच बेंगळुरूमध्ये या पदांसाठी मुलाखती झाल्या.
स्रोतांच्या माहितीनुसार, सध्या बांगलादेश क्रिकेट बोर्ड (बीसीबी) मध्ये स्ट्रेंथ अँड कंडिशनिंग विभागाचे प्रमुख म्हणून कार्यरत असलेले नाथन कीली भारतीय महिला संघाचे नवे स्ट्रेंथ अँड कंडिशनिंग कोच म्हणून रुजू होऊ शकतात.
नाथन कीली यांनी यापूर्वी न्यू साउथ वेल्स क्रिकेट संघासोबत असिस्टंट स्ट्रेंथ आणि कंडिशनिंग कोच म्हणून काम केले असून महिला बिग बॅश लीगमधील सिडनी सिक्सर्स संघाचे फिजिकल परफॉर्मन्स कोच म्हणूनही कार्य केले आहे. तसेच त्यांनी व्यावसायिक रग्बी लीग क्लब्स सिडनी रूस्टर्स आणि ब्रिस्बेन ब्रॉन्कोज सोबतही काम केले आहे.
गेल्या काही महिन्यांपासून भारतीय महिला संघाचे स्ट्रेंथ आणि कंडिशनिंग कोच म्हणून हर्षा कार्यरत होते. विश्वचषक जिंकण्याच्या प्रवासात संघाच्या फिटनेस व्यवस्थापनात त्यांचा मोठा वाटा होता.
मात्र, पुरुष आणि महिला दोन्ही संघांचे व्यस्त आंतरराष्ट्रीय वेळापत्रक लक्षात घेता, हर्षा यांना आता इतर जबाबदाऱ्या देण्यात येण्याची शक्यता आहे. सध्या ते बेंगळुरूमधील बीसीसीआय सेंटर ऑफ एक्सलन्स (सीओई) सोबत जोडलेले आहेत.
भारतीय पुरुष संघात सध्या या पदावर एड्रियन ले रॉक्स कार्यरत असून, हा त्यांचा दुसरा कार्यकाळ आहे.
