होर्मुझ सामुद्रधुनीत निर्माण झालेल्या अभूतपूर्व संकटाच्या काळात भारताने ऊर्जा पुरवठा सुरळीत ठेवण्यात यश मिळवले. केंद्रीय पेट्रोलियम आणि नैसर्गिक वायू मंत्री हरदीप सिंह पुरी यांनी सांगितले की, भारताच्या १२ एलपीजी वाहतूक करणाऱ्या जहाजांनी कोणताही टोल न भरता होर्मुझ सामुद्रधुनी सुरक्षितपणे पार केली आहे. याचबरोबर, देशांतर्गत स्वयंपाकाच्या गॅसचे उत्पादन वाढवण्यासाठी रिफायनऱ्यांमध्ये तातडीने आवश्यक तांत्रिक बदल करण्यात आले. त्यामुळे आधुनिक काळातील सर्वात मोठ्या ऊर्जा संकटाचा परिणाम भारतीय ग्राहकांवर होऊ दिला नाही.
होर्मुझ सामुद्रधुनी सुमारे चार महिने बंद राहिल्याने जागतिक ऊर्जा पुरवठ्यावर मोठा ताण निर्माण झाला होता. या पार्श्वभूमीवर केंद्र सरकारने ऊर्जा सुरक्षेसाठी अनेक तातडीच्या उपाययोजना केल्या. त्यामुळे देशात इंधन आणि एलपीजीचा पुरवठा अखंडित ठेवणे शक्य झाल्याचे पुरी यांनी सांगितले. त्यांच्या म्हणण्यानुसार, जगभरात ऊर्जा पुरवठा साखळी विस्कळीत झाली असताना भारताने पंतप्रधान नरेंद्र मोदी यांच्या नेतृत्वाखाली नियोजनबद्ध पावले उचलली. त्यामुळे देशातील नागरिकांना या जागतिक संकटाचा फारसा फटका बसला नाही.
पुरी यांनी सांगितले की, कच्च्या तेलाच्या आयातीसाठी भारताने विविध देशांशी संपर्क वाढवला, ऊर्जा पायाभूत सुविधांचा विस्तार केला आणि एलपीजीसाठी पर्यायी पुरवठा व्यवस्था उभारली. त्यामुळे देशात गॅस किंवा इंधनाची टंचाई निर्माण झाली नाही. संकटकाळात केंद्र सरकारने इंधनावरील केंद्रीय उत्पादन शुल्कात प्रतिलिटर १० रुपयांची कपात करून ग्राहकांना दिलासा दिला. तसेच घरगुती एलपीजी सिलिंडरचा पुरवठा सुरळीत राहावा यासाठी विशेष उपाय करण्यात आले. काळाबाजार रोखण्यासाठी आणि सिलिंडरचा गैरवापर टाळण्यासाठी डिजिटल ऑथेंटिकेशन कोड अनिवार्य करण्यात आला.
हे ही वाचा:
आरोग्य, संरक्षण ते अंतराळ क्षेत्रापर्यंत भारत- सेशेल्समध्ये १९ महत्त्वाचे करार
खामेनेई यांच्या अंत्यसंस्कारासाठी केंद्रीय मंत्री, बिहारचे राज्यपाल राहणार उपस्थित
धार्मिक कार्यक्रमात आक्षेपार्ह प्रसारण; ‘जिओ न्यूज’वर १५ दिवसांची बंदी
आसाम-अरुणाचलमध्ये मुसळधार पावसाचा कहर; २२ हजारांहून अधिक नागरिक प्रभावि
देशातील ज्या रिफायनऱ्यांमध्ये यापूर्वी एलपीजीचे उत्पादन होत नव्हते, त्याठिकाणी अल्पावधीत तांत्रिक सुधारणा करण्यात आल्या. त्याचा परिणाम म्हणून देशातील एलपीजी उत्पादन ३५ हजार मेट्रिक टन प्रतिदिनवरून ५४ हजार मेट्रिक टन प्रतिदिन इतके वाढले. याशिवाय भारताने अल्जेरिया, जपान आणि कॅनडा यांसारख्या देशांसोबत एलपीजी पुरवठ्याचे नवे करार केले. वाढती देशांतर्गत मागणी पूर्ण करण्यासाठी अमेरिकेतून अतिरिक्त एलपीजीच्या खेपाही आयात करण्यात आल्या, अशी माहिती हरदीप सिंह पुरी यांनी दिली.