महाराष्ट्रातील ज्येष्ठ शिक्षणतज्ज्ञ, उद्योजक, माजी राज्यपाल आणि पद्मश्री डॉ. डी. वाय. पाटील यांचे मंगळवार, ४ ऑगस्ट रोजी कोल्हापूर येथे वृद्धापकाळाने निधन झाले. ते ९० वर्षांचे होते. त्यांच्या निधनाने शिक्षण, आरोग्य, क्रीडा आणि सामाजिक क्षेत्रातील एक दूरदृष्टीचा नेतृत्वकर्ता हरपल्याची भावना व्यक्त होत आहे.
डॉ. डी. वाय. पाटील यांनी शिक्षण क्षेत्रात भरीव योगदान देत देशभरात शैक्षणिक संस्थांचे मोठे जाळे उभे केले. कोल्हापूर, पुणे, नवी मुंबई, पिंपरी- चिंचवडसह देशातील विविध भागांत अभियांत्रिकी, वैद्यकीय, दंतवैद्यकीय, कृषी, व्यवस्थापन, कायदा, नर्सिंग, फार्मसी आणि इतर उच्च शिक्षण संस्थांची स्थापना करून लाखो विद्यार्थ्यांना शिक्षणाची संधी उपलब्ध करून दिली. त्यांच्या नावाने स्थापन झालेल्या विद्यापीठांनी देश-विदेशातही वेगळी ओळख निर्माण केली आहे.
शिक्षणाबरोबरच आरोग्य क्षेत्रातही त्यांनी मोठे योगदान दिले. आधुनिक वैद्यकीय महाविद्यालये, बहुविशेषता रुग्णालये आणि संशोधन केंद्रांच्या माध्यमातून आरोग्यसेवा अधिक सक्षम करण्यासाठी त्यांनी महत्त्वपूर्ण काम केले. क्रीडा क्षेत्रालाही त्यांनी मोठे प्रोत्साहन दिले. नवी मुंबईतील डी. वाय. पाटील स्टेडियम आणि इतर क्रीडा सुविधा उभारण्यात त्यांचा मोलाचा वाटा होता.
राजकीय कारकिर्दीत त्यांनी काँग्रेसच्या तिकिटावर विधानसभेत प्रतिनिधित्व केले. त्यानंतर त्यांची त्रिपुराचे राज्यपाल म्हणून नियुक्ती झाली. पुढे त्यांनी बिहारचे राज्यपाल म्हणूनही जबाबदारी सांभाळली. काही काळ त्यांनी पश्चिम बंगालच्या राज्यपालपदाचा अतिरिक्त कार्यभार देखील सांभाळला. सार्वजनिक जीवनात शिक्षण आणि विकासाभिमुख दृष्टिकोनासाठी त्यांची ओळख होती.
हे ही वाचा:
अभिनेत्री तृषाबद्दल आक्षेपार्ह टिप्पणी; उदयनिधी स्टॅलिन यांना घेतले ताब्यात
मोदी हे इस्रायलचे सर्वोच्च मित्र!
लग्नाची शेरवानी जाळली; इस्त्रीवाल्याला १४ हजारांचा ‘चटका’
भारतीय ‘धुरंधरां’नी ३० हून अधिक दहशतवादी टिपले
शिक्षण आणि समाजकार्यातील उल्लेखनीय योगदानाबद्दल भारत सरकारने त्यांना ‘पद्मश्री’ पुरस्काराने सन्मानित केले होते. ग्रामीण भागातील विद्यार्थ्यांना गुणवत्तापूर्ण शिक्षण मिळावे, हा त्यांचा कायम ध्यास होता. त्यामुळे महाराष्ट्रासह देशभरातील हजारो विद्यार्थी, शिक्षक आणि शिक्षण क्षेत्राशी संबंधित व्यक्तींनी त्यांच्या निधनाबद्दल शोक व्यक्त केला आहे.