उत्तराखंडमध्ये पाच ट्रेकर्ससह आठ जण बेपत्ता

उत्तराखंडमधील केदारताल ट्रेकदरम्यान हिमस्खलन आणि अचानक झालेल्या हिमवृष्टीमुळे पश्चिम बंगालमधील पाच ट्रेकर्ससह एका मोहिमेतील आठ जण बेपत्ता झाले आहेत. या घटनेनंतर उत्तराखंड सरकारने शोध आणि बचावमोहीम सुरू केली असून, गेल्या दोन दिवसांपासून एसडीआरएफचे पथक हेलिकॉप्टरच्या मदतीने दुर्गम पर्वतीय भागात शोध घेत आहे. मात्र, प्रतिकूल हवामानामुळे बचावकार्यात अडथळे येत आहेत.

बेपत्ता झालेल्या पाच ट्रेकर्सची नावे तापस बाउरी, रतन घोष, रिंटू मंडल, उदय घोष आणि मनोज खवास अशी आहेत. यापैकी पहिले चार जण बांकुरा जिल्ह्यातील सालबानी गावातील, तर मनोज खवास हे केशरा गावातील रहिवासी आहेत. अन्य तिघांपैकी दोघे उत्तर प्रदेशातील लखनऊचे, तर एक जण उत्तराखंडमधील उत्तरकाशीचा आहे. हे पाचही ट्रेकर्स २४ ऑक्टोबरला उत्तराखंडला रवाना झाले होते. नोव्हेंबरच्या सुरुवातीला ते घरी परतणार होते.

माहितीनुसार, चार शेर्पा आणि एका सहाय्यकासह १२ सदस्यांचे पथक गंगोत्री येथून केदारतालच्या दिशेने निघाले होते. सुमारे चार हजार मीटर उंचीवरील डोंगराळ भागात अचानक हिमवृष्टी झाल्याने पथकातील बहुतांश सदस्य अडकले. ३० ऑक्टोबरला एका शेर्पासह चार सदस्य नियोजित ठिकाणी पोहोचण्यात यशस्वी झाले. त्यांनी उर्वरित आठ जण बेपत्ता असल्याची माहिती प्रशासनाला दिली.

हे ही वाचा:

रशियाचा युक्रेनच्या शाळेवर दुहेरी हवाई हल्ला; २४ ठार

बीएसएफ जवानांवरील हल्ल्याप्रकरणी नऊ जणांना अटक

कनेक्टिव्हिटी वाढल्याने पुण्याच्या विकासाला चालना

दिया मिर्झाचा व्हिडीओ पुन्हा अपलोड करा!

दरम्यान, पश्चिम बंगालचे मुख्यमंत्री सुवेंदू अधिकारी यांनी या घटनेबाबत चिंता व्यक्त केली आहे. राज्य सरकार उत्तराखंड प्रशासन आणि एसडीआरएफच्या संपर्कात असून, बचावकार्याची नियमित माहिती घेत आहे. बांकुरा जिल्हा प्रशासनानेही बेपत्ता ट्रेकर्सच्या कुटुंबीयांशी संपर्क साधून त्यांना मदतीचे आश्वासन दिले आहे.