सुट्या खाद्यतेलाच्या विक्रीवर FDAचा कडक बडगा

महाराष्ट्रात खाद्यपदार्थांच्या भेसळीविरोधातील कारवाईला आता आणखी वेग आला असून, अन्न व औषध प्रशासनाचे आयुक्त तुकाराम मुंढे यांनी सुट्या खाद्यतेलाच्या विक्रीवर कडक निर्बंध लागू करण्याची भूमिका घेतली आहे. नागरिकांच्या आरोग्याशी थेट संबंधित असलेल्या खाद्यतेलाच्या गुणवत्तेबाबत कोणतीही तडजोड केली जाणार नसल्याचा स्पष्ट संदेश FDAकडून देण्यात आला आहे.

सुटे खाद्यतेल उघड्या स्वरूपात किंवा नियमांचे पालन न करता विकले जात असल्यास त्यातून भेसळ, दूषितपणा आणि निकृष्ट दर्जाच्या तेलाचा धोका वाढतो. त्यामुळे खाद्यतेलाची विक्री, साठवणूक आणि हाताळणी करताना अन्न सुरक्षा नियमांचे काटेकोर पालन करणे आवश्यक असल्याचे FDAने स्पष्ट केले आहे. ग्राहकांना दर्जेदार आणि सुरक्षित खाद्यतेल उपलब्ध करून देणे ही विक्रेते तसेच खाद्य व्यवसायांची जबाबदारी असल्याचेही प्रशासनाने अधोरेखित केले आहे.
हे ही वाचा:
पोलिसांच्या बळासह आंदोलनातील हिंसाचाराची होणार चौकशी

१९८४ शीख दंगलीतील दोषी माजी काँग्रेस खासदार सज्जन कुमार यांचे निधन

तुकाराम मुंढे यांच्या नेतृत्वाखाली FDAकडून सध्या राज्यभर खाद्यपदार्थांच्या गुणवत्तेची तपासणी आणि नियमभंग करणाऱ्या आस्थापनांवर कारवाई केली जात आहे. हॉटेल, रेस्टॉरंट, शाळांमधील कॅन्टीन, खाद्यपदार्थ विक्रेते आणि इतर व्यावसायिक आस्थापनांनंतर आता खाद्यतेलाच्या विक्रीकडेही प्रशासनाने विशेष लक्ष केंद्रित केले आहे.

खाद्यतेल विक्रेत्यांनी अधिकृत पॅकिंग, योग्य लेबलिंग, साठवणुकीच्या अटी आणि परवान्यांसह संबंधित अन्न सुरक्षा नियमांचे पालन करणे अपेक्षित आहे. नियमांचे उल्लंघन आढळल्यास तपासणी, नमुने घेणे, साठा जप्त करणे तसेच आवश्यकतेनुसार कायदेशीर कारवाई केली जाऊ शकते. महाराष्ट्र FDAकडून अन्न सुरक्षा कायदे आणि FSSAIच्या नियमांची राज्यात अंमलबजावणी केली जाते.

दरम्यान, FDAच्या या व्यापक मोहिमेमुळे खाद्य व्यवसायांमध्ये नियमपालनाबाबत सतर्कता वाढली आहे. नागरिकांच्या ताटातील अन्न सुरक्षित आणि भेसळमुक्त असावे, यासाठी प्रशासनाने तपासणी आणि कारवाईची मोहीम अधिक तीव्र करण्याचे संकेत दिले आहेत. त्यामुळे सुटे खाद्यतेल विकणाऱ्या व्यावसायिकांसह खाद्यपदार्थ क्षेत्रातील इतर विक्रेत्यांनाही आता नियमांचे काटेकोर पालन करावे लागणार आहे.