‘आय लव्ह मोहम्मद’: बरेलीमध्ये हॉल सील केल्याने ६०० लग्नांचे नियोजन कोलमडले!

सोमवारी (२९ सप्टेंबर) जिल्हा प्रशासनाने बेकायदेशीर अतिक्रमणाच्या आरोपावरून बरेली येथील सात बँक्वेट हॉल आणि फार्महाऊस सील केल्याने, शेकडो विवाह सोहळ्यांचे नियोजन धुळीला मिळाले आहे. ही कारवाई गेल्या शुक्रवारी “आय लव्ह मुहम्मद” मोहिमेच्या निदर्शक आणि पोलिसांमध्ये झालेल्या संघर्षानंतर करण्यात आली. बरेली विकास प्राधिकरणाच्या (बीडीए) एका वरिष्ठ अधिकाऱ्याने नाव गुप्त ठेवण्याच्या अटीवर सांगितले की, सील करण्यात आलेल्या बहुतेक मालमत्ता अल्पसंख्याक समुदायाच्या सदस्यांशी संबंधित आहेत.

यामध्ये अनेक मालमत्ता इत्तेहाद-ए-मिल्लत कौन्सिलचे प्रमुख मौलाना तौकीर रझा खान यांच्याशी संबंधित असल्याचेही त्यांनी सांगितले. मौलाना तौकीर रझा खान यांना इस्लामिया ग्राउंडवर आयोजित केलेल्या मेळाव्याच्या अनुषंगाने अटक करण्यात आली होती. या मेळाव्याला प्रशासनाने तोंडी आणि लेखी स्वरूपात परवानगी नाकारली होती, आणि त्यानंतरच संघर्ष उफाळून आला.

बीडीएचे सचिव दीपक कुमार यांनी सांगितले, “ही आस्थापने बेकायदेशीररित्या बांधण्यात आली होती. त्यांनी मंजूर नकाशे तसेच बांधकाम मार्गदर्शक तत्त्वांचे उल्लंघन केले होते. त्यांना नोटिसा बजावण्यात आल्या होत्या, मात्र कुठलेही उत्तर मिळाले नाही. हे पाऊल उचलण्यापूर्वी आम्ही सर्व संबंधित कागदपत्रांची योग्यरीत्या तपासणी व पडताळणी केली आहे. जर कोणाकडे वैध दस्तऐवज असतील, तर ते सादर करू शकतात. मालकांना आक्षेप नोंदवण्यासाठी तीन दिवसांचा कालावधी आहे.”

फ्लोरा गार्डन, जलसा ग्रीन, फहम लॉन, आरिश मॅरेज हॉल, मन्नत आणि हम सफर यासारख्या सील केलेल्या ठिकाणी येत्या काही महिन्यांत ६०० हून अधिक लग्नांसाठी बुकिंग होते. मालकांनी सांगितले की ज्या जागा एकेकाळी दिवे आणि संगीताने भरलेल्या होत्या त्या आता बंद आणि निर्जन आहेत.

अरिश हॉटेल्स चेनचे व्यवस्थापक अर्शद खान म्हणाले, “आम्ही अधिकाऱ्यांच्या निर्देशांचे पूर्णपणे पालन करत आहोत. सध्या सर्व बुकिंग रद्द करण्यात आली आहेत आणि आमच्या ठिकाणी होणारे आगामी लग्न अनिश्चित आहेत. पुढील पाच महिन्यांत सुमारे ४०० लोकांनी लग्नासाठी आमची हॉटेल्स बुक केली होती.”

हे ही वाचा : 

सेवा परमो धर्म या आदर्शाने प्रेरित आहे संघ

आरएसएफच्या ड्रोन हल्ल्यात ८ नागरिकांचा मृत्यू

पंतप्रधान मोदींनी मल्लिकार्जुन खर्गे यांची केली विचारपूस

नाशिकमध्ये पावसाने दसऱ्याचा रंग फिका

हॉल सील केल्यामुळे आगाऊ रक्कम भरलेल्या कुटुंबांमध्ये भीतीचे आणि अनिश्चिततेचे वातावरण निर्माण झाले आहे. अनेक बुकिंग्ज फेब्रुवारीपासूनच सुरू झाली होती. बारादरी येथील व्यापारी मोहम्मद कासिम यांनी सांगितले, “माझे लग्न २४ ऑक्टोबर रोजी फ्लोरा गार्डन येथे होणार होते. पण आता ते ठिकाण सील झाल्यामुळे आम्हाला मोठ्या अडचणींना सामोरे जावे लागत आहे. बहुतेक बँक्वेट हॉल आधीच बुक झाले आहेत, त्यामुळे आता आम्ही दुसऱ्या ठिकाणाचा शोध घेत आहोत.”