हॉर्मुझ सामुद्रधुनीतील तेलवाहू जहाजांवर झालेल्या हल्ल्यात एका भारतीय खलाशाचा मृत्यू झाल्यानंतर भारताने इराणविरुद्ध कठोर राजनैतिक पाऊल उचलले आहे. परराष्ट्र मंत्रालयाने (MEA) इराणचे उपराजदूतांसह वरिष्ठ राजनैतिक अधिकाऱ्यांना समन्स बजावून तीव्र निषेध नोंदवला आहे. या हल्ल्यात अनेक भारतीय खलाशी जखमी झाल्याने भारताने या घटनेबाबत गंभीर चिंता व्यक्त केली आहे.
माहितीनुसार, परराष्ट्र मंत्रालयाने इराणी अधिकाऱ्यांना स्पष्टपणे सांगितले की, भारतीय नागरिकांच्या सुरक्षिततेला सर्वोच्च प्राधान्य आहे. व्यापारी जहाजांवर काम करणाऱ्या भारतीय खलाशांच्या जीविताचे संरक्षण करण्याची जबाबदारी आंतरराष्ट्रीय कायद्यानुसार संबंधित देशांवर आहे. भारताने या हल्ल्याची सखोल चौकशी करून जबाबदारांवर कारवाई करण्याची मागणीही केली आहे.
रविवारी हॉर्मुझ सामुद्रधुनीत दोन संयुक्त अरब अमिराती (UAE)च्या तेलवाहू जहाजांवर क्षेपणास्त्र हल्ला झाला. या हल्ल्यात एका भारतीय खलाशाचा मृत्यू झाला, तर अनेक जण जखमी झाले. इराणच्या इस्लामिक रिव्होल्युशनरी गार्ड कॉर्प्स (IRGC) ने जहाजांनी इशाऱ्यांकडे दुर्लक्ष केल्याचा आणि नेव्हिगेशन प्रणाली बंद केल्याचा दावा केला आहे. मात्र या दाव्याची स्वतंत्रपणे पुष्टी झालेली नाही.
भारतीय अधिकाऱ्यांनी इराणच्या राजनैतिक प्रतिनिधींना सांगितले की, भारतीय नागरिकांचा मृत्यू आणि जखमी होण्याच्या घटना अत्यंत गंभीर आहेत. भविष्यात अशा घटना टाळण्यासाठी आवश्यक ती पावले उचलावीत आणि समुद्री मार्गावरील व्यापारी जहाजांची सुरक्षितता सुनिश्चित करावी, अशी मागणी भारताने केली.
हे ही वाचा:
प्रसूतीनंतर १८ महिलांचा मृत्यू; सात जणी डायलिसिसवर
४२ नरेंद्र मोदी स्टेडियमएवढी रेल्वेची जमीन अतिक्रमणाखाली
हॉर्मुझ सामुद्रधुनीत दोन तेलवाहू टँकर्सवर हल्ला; एका भारतीय खलाशाचा मृत्यू
अमेरिका-इराण संघर्षामुळे हॉर्मुझ सामुद्रधुनीतील परिस्थिती दिवसेंदिवस अधिक तणावपूर्ण बनत आहे. जगातील मोठ्या प्रमाणावर कच्च्या तेलाची वाहतूक या मार्गाने होत असल्याने या भागातील प्रत्येक हल्ल्याचा परिणाम जागतिक ऊर्जा पुरवठा आणि समुद्री व्यापारावर होण्याची शक्यता आहे. भारतासाठीही हा मार्ग अत्यंत महत्त्वाचा असल्याने सरकार परिस्थितीवर बारकाईने लक्ष ठेवून आहे. भारताने या घटनेनंतर आखाती प्रदेशातील भारतीय खलाशी आणि व्यापारी जहाजांच्या सुरक्षेबाबत सतर्कता वाढवली आहे. परराष्ट्र मंत्रालय, नौवहन मंत्रालय आणि संबंधित यंत्रणा परिस्थितीवर सातत्याने लक्ष ठेवून असून प्रभावित भारतीय नागरिकांना आवश्यक ती मदत उपलब्ध करून देण्याचे प्रयत्न सुरू आहेत.