हिमाचल प्रदेशातील किन्नौर जिल्ह्यातील किन्नर कैलाश यात्रेच्या मार्गावर अडकलेल्या ४१३ तीर्थयात्रेकरूंना सुरक्षितपणे बाहेर काढण्यात आले आहे. हे भाविक मुसळधार पावसामुळे आणि ढगफुटीमुळे दोन तात्पुरते पूल वाहून गेल्याने अडकले होते. भारत-तिब्बत सीमा पोलीस दल (ITBP) आणि राष्ट्रीय आपत्ती प्रतिसाद दल (NDRF) यांनी संयुक्त बचाव मोहिमेत त्यांची सुटका केली. ITBP ने सोशल मीडिया प्लॅटफॉर्म ‘एक्स’वर काही छायाचित्रे शेअर केली, ज्यामध्ये तीर्थयात्रेकरूंना सुरक्षितपणे बाहेर काढताना दाखवण्यात आले आहे. व्हिडिओमध्ये अधिकारी दुर्गम भागांमध्ये समन्वय साधत बचाव कार्य करताना दिसत आहेत. ITBP ने सांगितले की, ते स्थानिक जिल्हा प्रशासन आणि इतर संस्थांबरोबर मिळून सर्वतोपरी मदत करत आहेत.
ITBP ने पोस्टमध्ये लिहिले, किन्नौरचे जिल्हाधिकारी (DC) यांच्या विनंतीवरून, सततच्या पावसामुळे किन्नर कैलाश यात्रेच्या मार्गावर दोन तात्पुरते पूल वाहून गेल्याने अनेक प्रवासी अडकले होते. त्यासाठी ITBP ने पर्वतारोहण व RRC (रज्जु बचाव) उपकरणांसह एक बचाव पथक तैनात केले आहे. या भागात मुसळधार पावसामुळे ढगफुटीच्या घटना घडल्या असून, बुधवारी सकाळी टांगलिंग नाल्यावरचा एक पूल वाहून गेला, ज्यामुळे अनेक पर्यटक व भाविक या दुर्गम ट्रेकिंग मार्गावर अडकले. माहिती मिळाल्यानंतर तात्काळ कारवाई करत ITBP च्या १७व्या बटालियनच्या बचाव पथकाने दोरीच्या आधारे ट्रॅव्हर्स क्रॉसिंग तंत्रज्ञानाचा वापर करून सर्व ४१३ लोकांना सुरक्षित स्थळी पोहोचवले.
हेही वाचा..
पंतप्रधान मोदींच्या हस्ते ‘कर्तव्य भवन’चे उद्घाटन
कावड यात्रेला बदनाम करण्याचा कट फसला
हमीरपूर डिव्हिजनला आतापर्यंत २११ कोटींचे नुकसान
ट्रेनमधील ११,५३५ डब्यांमध्ये सीसीटीव्ही कॅमेरे
दिवसभरात किन्नौर जिल्हा प्रशासनाकडून आणखी लोक अडकल्याची माहिती मिळाल्यानंतर ITBP व NDRF ची पथके पुन्हा घटनास्थळी पाठवण्यात आली. अधिकाऱ्यांनी पुष्टी केली की बचाव मोहिम अजूनही सुरू आहे. या मोहीमेसाठी ITBP ने विशेष पर्वतारोहण व रज्जु बचाव उपकरणे पाठवली होती, ज्यामध्ये पर्वतारोहणाचे बूट, आइस ऍक्स, दोर, क्रॅम्पॉन, हार्नेस आणि हिमनद्या पार करण्यासाठी लागणारी साधने यांचा समावेश होता. दरम्यान, हिमाचल प्रदेश यावर्षीच्या मान्सूनच्या प्रकोपामुळे गंभीर अडचणीत सापडला आहे. राज्य आपत्ती व्यवस्थापन प्राधिकरण (SDMA) च्या अहवालानुसार, २० जून ते ५ ऑगस्ट या काळात मुसळधार पावसामुळे, भूस्खलन व इतर संबंधित आपत्तीमुळे राज्यात एकूण १९४ मृत्यू झाले आहेत आणि एकूण १.८५ लाख कोटी रुपयांचे नुकसान झाल्याची नोंद आहे.
