शस्त्र सोडले, पुस्तक उचलले; छत्तीसगडमध्ये सात माजी माओवादी दहावी पास

छत्तीसगडमध्ये माओवादाचा मार्ग सोडून मुख्य प्रवाहात परतलेल्या सात माजी माओवाद्यांनी यंदा दहावीची एसएससी परीक्षा उत्तीर्ण केली आहे. यापैकी तिघांनी प्रथम श्रेणी मिळवली असून, त्यात ३५ वर्षीय गीता नारोटे यांचा समावेश आहे. या सर्वांनी ऑगस्टमध्ये छत्तीसगड मुक्त शाळेतून परीक्षा दिली होती.

गडचिरोलीतील गिरेकोसा गावातील गीता नारोटे यांना लहानपणापासून शिक्षणाची आवड होती. मात्र वडिलांच्या निधनानंतर त्यांना सहावीनंतर शिक्षण सोडावे लागले. त्यानंतर त्या माओवादी चळवळीत सहभागी झाल्या. सुमारे दोन दशकांनंतर मुख्य प्रवाहात परतलेल्या गीता माओवादी संघटनेत ‘डॉ. चंपा’ या नावाने ओळखल्या जात होत्या. त्यांनी वैद्यकीय उपचाराचे प्रशिक्षण घेतले होते. आत्मसमर्पणानंतर मिळालेल्या ५० हजार रुपयांपैकी काही रक्कम त्यांनी पुस्तके खरेदी करण्यासाठी वापरली. स्वयंअध्ययनातून दहावी उत्तीर्ण झाल्यानंतर आता बारावी पूर्ण करून परिचारिका होण्याची त्यांची इच्छा आहे.

बीजापूर जिल्ह्यातील अर्जुन ओयाम यांनीही माओवादी चळवळीत जाण्यापूर्वी शिक्षण सुरू ठेवण्याची इच्छा व्यक्त केली होती. गावातील परिस्थिती बिघडल्यानंतर शाळा बंद पडली. सलवा जुडूमच्या काळात त्यांचे घर आणि पुस्तके जाळण्यात आली. २०१० मध्ये त्यांनी माओवादी चळवळीत प्रवेश केला. संघटनेत असताना त्यांनी राजकीय शाळेत शिक्षण घेतले आणि शिक्षक म्हणून मूलभूत गणित, हिंदी व पर्यावरण शिकवले. नंतर त्यांनी शस्त्र सोडले. आत्मसमर्पणानंतर पोलिसांनी कागदपत्रे मिळवून देण्यासाठी मदत केली. दिवसा मत्स्यपालन आणि इलेक्ट्रिशियनचे प्रशिक्षण घेत, रात्री अभ्यास करून त्यांनी प्रथम श्रेणी मिळवली. आता शिक्षक होण्याचे त्यांचे स्वप्न आहे.

हे ही वाचा:

इंडी आघाडीच्या बैठकीकडे आप, डीएमकेची पाठ

८० वर्षीय व्यक्तीचा मृतदेह चार वर्षे फ्रीजरमध्ये

भारत-पाक सीमेजवळ महामार्गावर उतरले लष्कराचे हेलिकॉप्टर

इराणचा संयुक्त राष्ट्रांवर ‘शोले’ स्टाईल हल्लाबोल

संतोष आचला उर्फ सन्नू यांनी दुसरीतच शिक्षण सोडले आणि २००८ मध्ये माओवादी चळवळीत प्रवेश केला. संघटनेत ते तरुण कार्यकर्त्यांना गणित आणि हिंदी शिकवत होते. सिमकार्ड नसलेल्या मोबाईल, मेमरी कार्ड आणि पेनड्राइव्हच्या मदतीने त्यांनी अभ्यास केला. आता पुढील शिक्षणासोबत व्यवसाय आणि शेती करण्याची त्यांची इच्छा आहे. “शिक्षणाशिवाय काहीही करता येत नाही,” असे त्यांनी सांगितले.