उत्तर प्रदेशातील प्रयागराज येथे आयोजित महाकुंभ मेळ्यात आतापर्यंत सहा कोटींहून अधिक लोकांनी स्नान केले आहे. गुरुवारी (१६ जानेवारी) कुंभमेळ्याचा चौथा दिवस असून सायंकाळी ५ वाजेपर्यंत २५ लाखांहून अधिक भाविकांनी संगमात स्नान केले. महाकुंभ २०२५ मध्ये आतापर्यंत चार दिवसांत ६.२५ कोटी भाविकांनी संगमात स्नान केले आहे. यामध्ये मकर संक्रांतीच्याच दिवशी सुमारे ३.५ कोटी भाविकांनी त्रिवेणी संगमात स्नान केले होते.
१३ जानेवारीपासून सुरू झालेला कुंभमेळा २६ फेब्रुवारीपर्यंत चालणार आहे. हा मेळा दर १२ वर्षांनी भरतो आणि दीड महिना चालतो. प्रयागराजमधील महाकुंभाव्यतिरिक्त नाशिक, हरिद्वार आणि उज्जैन येथेही कुंभमेळ्याचे आयोजन केले जाते. यावेळचा महाकुंभ विशेष आहे, कारण या दिवशी सूर्य, चंद्र, शनि आणि गुरु या ग्रहांची शुभ स्थिती निर्माण होत आहे. समुद्रमंथनादरम्यान हा शुभ योगायोग घडल्याचे सांगितले जाते. यासोबतच महाकुंभात पौर्णिमा, रवियोग, भाद्रवस योगही असतील.
हे ही वाचा :
सैफचा हल्लेखोर सीसीटीव्हीत दिसला, पायऱ्या उतरतानाचा व्हीडिओ
आतिशी, संजय सिंह यांच्याविरोधात काँग्रेसने थोपटले दंड!
मोरोक्कोकडून ३० लाख भटक्या कुत्र्यांना मारण्याचे आदेश ?
केंद्रीय कर्मचाऱ्यांसाठी आनंदाची बातमी, आठव्या वेतन आयोगाला मंजुरी!
प्रयागराज येथे आयोजित करण्यात आलेला महाकुंभ हा जगातील सर्वात मोठा मेळा आहे. यात ४५ कोटींहून अधिक लोक सहभागी होण्याची अपेक्षा आहे. पहिल्या चार दिवसांतच हा आकडा सात कोटींच्या जवळ पोहोचला आहे. मुख्य स्नानाच्या तारखांना महाकुंभात मोठी गर्दी असते. मकर संक्रांती ही अमृतस्नानाची पहिली तिथी आहे, ज्यामध्ये तीन कोटींहून अधिक भाविक सहभागी झाले होते. अमृतस्नानच्या अजून दोन तारखा बाकी आहेत. अमृत स्नानाची दुसरी तिथी २८ जानेवारीच्या संध्याकाळपासून २९ जानेवारीच्या संध्याकाळपर्यंत आहे. तर तिसरी तिथी ३ फेब्रुवारीला बसंत पंचमीच्या दिवशी असेल. अशा परिस्थितीत अमृतस्नानासाठी या तारखांना मोठ्या संख्येने भाविक येण्याची शक्यता आहे.
कडाक्याची थंडी असूनही त्रिवेणी संगमावर न्हाऊन निघण्यासाठी भाविक मोठ्या संख्येने उमेद आणि उत्साहाने दाखल होत आहेत. यातील अनेक भाविक प्रथमच या जत्रेचा भाग बनले आहेत आणि विशेष प्रसंगी पवित्र गंगा नदीत स्नान करत आहेत. स्नान केल्यानंतर खूप ताजेतवाने वाटत असल्याचे एका भक्ताने सांगितले. त्याचवेळी आणखी एका भाविकाने जत्रेतील व्यवस्थेबद्दल प्रशासनाचे कौतुक केले. यासह परदेशातील लोकही मोठ्या प्रमाणात महाकुंभ मेळ्यात सहभागी होत आहेत.
