पर्युषण पर्वातील मांसविक्री बंदीवरून वाद

वसई-विरारमध्ये पर्युषण पर्वाच्या पार्श्वभूमीवर मांस, मटण, चिकन आणि मासळी विक्री बंद ठेवण्याच्या आवाहनावरून वाद निर्माण झाला आहे. जैन समाजाच्या धार्मिक भावना लक्षात घेऊन महापालिकेने पर्युषण पर्वातील दोन दिवशी मांसाहारी पदार्थांची विक्री करणारी दुकाने बंद ठेवण्याचे आवाहन केले आहे. मात्र, या निर्णयाला मराठी एकीकरण समितीने तीव्र विरोध केला असून, महापालिकेने हा निर्णय तातडीने मागे घ्यावा, अशी मागणी करण्यात आली आहे.

जैन धर्मीयांसाठी पर्युषण पर्वाला विशेष धार्मिक महत्त्व आहे. या काळात अहिंसा, संयम, उपवास आणि आत्मचिंतनाला महत्त्व दिले जाते. प्राणिमात्रांवरील हिंसा टाळण्याच्या भावनेतून पर्युषण पर्वाच्या काही दिवशी कत्तलखाने बंद ठेवण्याची मागणी जैन समाजाकडून केली जाते. याच पार्श्वभूमीवर महापालिकेकडून संबंधित दिवशी मांसाहारी पदार्थांच्या विक्रीबाबत आवाहन करण्यात आले आहे.
हे ही वाचा:
बांगलादेशात वेगवेगळ्या घटनांत दोन हिंदूंची हत्या

विधानसभेतील गदारोळानंतर बीआरएसचे २२ आमदार निलंबित

मात्र, कत्तलखाने बंद ठेवण्याच्या निर्णयापेक्षा मांसविक्रीची दुकाने बंद ठेवण्याचे आवाहन वेगळे असल्याचा आक्षेप मराठी एकीकरण समितीने घेतला आहे. धार्मिक भावना आणि श्रद्धांचा आदर केला पाहिजे, मात्र त्यासाठी इतर नागरिकांच्या आहाराच्या स्वातंत्र्यावर किंवा व्यवसायावर परिणाम होता कामा नये, अशी भूमिका समितीने मांडली आहे. महापालिकेने सर्व समाजांच्या भावना आणि नागरिकांच्या मूलभूत स्वातंत्र्याचा विचार करून निर्णय घ्यावा, अशी मागणीही करण्यात आली आहे.

दरम्यान, महापालिकेच्या आवाहनावरून सोशल मीडिया आणि स्थानिक पातळीवरही चर्चा सुरू झाली आहे. या निर्णयामुळे धार्मिक श्रद्धा, नागरिकांचे आहारस्वातंत्र्य आणि व्यापाऱ्यांच्या व्यवसायाचा प्रश्न पुन्हा ऐरणीवर आला आहे. विशेष म्हणजे, महापालिकेने हे आवाहन सक्तीचे नसल्याचे स्पष्ट केले आहे. त्यामुळे प्रत्यक्षात मांसविक्री करणारे व्यावसायिक आणि नागरिक यावर कशी प्रतिक्रिया देतात, हेही महत्त्वाचे ठरणार आहे.

एका समाजाच्या धार्मिक भावनांचा सन्मान राखतानाच इतर समाजांच्या हक्कांवर परिणाम होणार नाही, यासाठी प्रशासनाने संतुलित भूमिका घ्यावी, अशी अपेक्षा व्यक्त होत आहे. त्यामुळे वसई-विरारमधील हा वाद आता महापालिका प्रशासन कोणती भूमिका घेते, यावर येऊन ठेपला आहे.