ऑनलाइन किराणा आणि दैनंदिन गरजेच्या वस्तूंच्या जलद वितरणानंतर आता स्विगी इन्स्टामार्ट (Swiggy Instamart) ने आणखी एक महत्त्वाचे पाऊल उचलले आहे. कंपनीने हिंदुस्तान पेट्रोलियम कॉर्पोरेशन लिमिटेड (HPCL) सोबत भागीदारी करत क्विक-कॉमर्स प्लॅटफॉर्मद्वारे LPG गॅस सिलिंडर घरपोच पोहोचवण्याचा भारतातील पहिला पायलट प्रकल्प सुरू केला आहे. या सेवेला सुरुवात बेंगळुरूमधील काही भागांत करण्यात आली असून, पुढील काही आठवड्यांत ती संपूर्ण शहरात आणि त्यानंतर इतर शहरांमध्ये विस्तारण्याची योजना आहे.
सध्या हा पायलट बेंगळुरूमधील उत्तरहल्ली आणि सुब्रमण्यपुरा परिसरात सुरू करण्यात आला आहे. या सेवेद्वारे ग्राहकांना HPCLचा १० किलोचा ‘HP Navya’ कॉम्पोझिट सिलिंडर आणि ५ किलोचा ‘Appu’ धातूचा सिलिंडर मागवता येणार आहे. विशेष म्हणजे, हे सिलिंडर खरेदी करण्यासाठी ग्राहकांकडे आधीपासून HP Gas कनेक्शन असणे आवश्यक नाही.
१० किलोचा HP Navya सिलिंडर पारंपरिक लोखंडी सिलिंडरपेक्षा हलका असून त्याची बॉडी अंशतः पारदर्शक आहे. त्यामुळे आत किती गॅस शिल्लक आहे, हे सहज पाहता येते. हा सिलिंडर विशेषतः विद्यार्थी, नोकरी करणारे तरुण, लहान कुटुंबे तसेच अतिरिक्त (बॅकअप) सिलिंडरची गरज असलेल्या ग्राहकांसाठी उपयुक्त ठरणार असल्याचे HPCLने सांगितले आहे.
ही सेवा जरी इन्स्टामार्टवर उपलब्ध असली तरी सिलिंडरची डिलिव्हरी Swiggyच्या डिलिव्हरी पार्टनरकडून नव्हे, तर HPCLच्या अधिकृत वितरकांकडून आणि प्रशिक्षित कर्मचाऱ्यांकडून केली जाणार आहे. त्यामुळे सर्व सुरक्षा नियम आणि सरकारी मार्गदर्शक तत्त्वांचे पालन केले जाईल. पहिल्यांदा सिलिंडर घेणाऱ्या ग्राहकांना ओळखपत्र दाखवावे लागेल, तर पुढील रिफिल घेताना रिकामा सिलिंडर परत देणे बंधनकारक असेल. प्रायोगिक टप्प्यात सिलिंडर सुमारे ४५ मिनिटांत ग्राहकांच्या घरी पोहोचवण्याचे लक्ष्य ठेवण्यात आले आहे. सेवा विस्तारल्यानंतर डिलिव्हरीचा वेळ आणखी कमी करण्याचा प्रयत्न केला जाणार असल्याचे वृत्त आहे.
स्विगी इन्स्टामार्टचे मुख्य कार्यकारी अधिकारी अमितेश झा यांनी सांगितले की, इन्स्टामार्ट आता केवळ किराणा मालापुरता मर्यादित राहिलेला नाही. ग्राहकांच्या दैनंदिन आयुष्यातील अत्यावश्यक सेवाही या प्लॅटफॉर्मवर उपलब्ध करून देण्याचा कंपनीचा प्रयत्न आहे. दुसरीकडे, HPCLचे संचालक (मार्केटिंग) अमित गर्ग यांनी या भागीदारीमुळे सुरक्षित, विश्वासार्ह आणि अधिक सुलभ LPG सेवा ग्राहकांपर्यंत पोहोचेल, असा विश्वास व्यक्त केला.
हे ही वाचा:
‘नो एंट्री’ पुलावर बर्थडे पार्टी! २६ कोटींच्या पुलावर वाढदिवसाचा धुमाकूळ
सिया गोयलच्या वडिलांच्या दुकानावर तात्पुरती बंदी
“श्रीकृष्ण मुस्लिम होते, दिवसातून पाच वेळा नमाज पढत होते” मौलाना बरळले
दुसरीतील हिंदू विद्यार्थ्याला ‘कलमा’ पठणाचा गृहपाठ; शिक्षिकेची हकालपट्टी
विशेष म्हणजे, काही महिन्यांपूर्वी इराणमधील संघर्षामुळे भारतातील एलपीजी पुरवठ्याबाबत चिंता व्यक्त केली जात होती. अशा पार्श्वभूमीवर आवश्यक सेवांचे डिजिटल वितरण अधिक सुलभ करण्याच्या दिशेने हा उपक्रम महत्त्वाचा मानला जात आहे. भारत हा जगातील दुसऱ्या क्रमांकाचा एलपीजी वापर करणारा देश असून, इंडियन ऑइल, भारत पेट्रोलियम आणि हिंदुस्तान पेट्रोलियम या सरकारी कंपन्यांमार्फत घरगुती गॅसचा पुरवठा केला जातो.