जगभरात हंता व्हायरसच्या चर्चेनंतर आता आणखी एका संसर्गजन्य आजाराने चिंता वाढवली आहे. कॅरिबियन समुद्रात प्रवास करणाऱ्या “कॅरिबियन प्रिन्सेस” या आलिशान क्रूझ जहाजावर नोरोव्हायरसचा उद्रेक झाल्याने ११५ जण आजारी पडले आहेत. यामध्ये १०२ प्रवासी आणि १३ क्रू सदस्यांचा समावेश आहे. अमेरिकेची आरोग्य संस्था सीडीसीने या घटनेची पुष्टी केली आहे.
ही क्रूझ २८ एप्रिल रोजी फ्लोरिडामधून निघाली होती. जहाजावर तब्बल ३,११६ प्रवासी आणि १,१३१ कर्मचारी होते. प्रवासादरम्यान बहामाज, अरुबा, कुराकाओ, प्यूर्टो रिको आणि डोमिनिकन रिपब्लिकसह अनेक पर्यटनस्थळांना भेट देण्यात आली. मात्र, ७ मेनंतर अचानक प्रवाशांमध्ये उलट्या, जुलाब, पोटदुखी आणि मळमळ यांसारखी लक्षणे मोठ्या प्रमाणात दिसू लागली.
हे ही वाचा:
कान्हा व्याघ्र प्रकल्पात भटक्या कुत्र्यांमुळे ५ वाघ मेले
तुमच्या जिद्दीने देशाचा मान उंचावला
लग्नात ‘लेग पीस’वरून झालेल्या वादात तरुणाचा मृत्यू, एक जखमी
सत्तापालट ? नव्हे, हे तर बंगाल चे सांस्कृतिक पुनर्जागरण
सीडीसीच्या नियमानुसार जहाजावरील ३ टक्क्यांपेक्षा अधिक लोक आजारी पडल्यास त्याची सार्वजनिक माहिती देणे बंधनकारक असते. त्यामुळे प्रकरण गंभीर मानून तातडीने तपास सुरू करण्यात आला. जहाजावर विशेष स्वच्छता मोहीम राबवण्यात आली असून प्रत्येक विभाग वारंवार सॅनिटाइज केला जात आहे. संक्रमित प्रवाशांना वेगळे ठेवण्यात आले असून त्यांच्या नमुन्यांची तपासणी सुरू आहे.
प्रिन्सेस क्रूझ कंपनीने हा संसर्ग सौम्य स्वरूपाचा असल्याचा दावा केला आहे. कंपनीनुसार सर्व प्रवासी एकाचवेळी आजारी पडले नाहीत आणि अनेक जण आता बरे होत आहेत. जहाज ११ मे रोजी पोर्ट कॅनाव्हेरल येथे पोहोचल्यानंतर त्याचे संपूर्ण डिसइन्फेक्शन केले जाणार आहे.
दरम्यान, काही दिवसांपूर्वी दुसऱ्या एका क्रूझ जहाजावर हंता व्हायरसचा संसर्ग झाल्याने तीन जणांचा मृत्यू झाला होता. त्या घटनेनंतर आता नोरोव्हायरसचा उद्रेक झाल्याने आंतरराष्ट्रीय आरोग्य यंत्रणांची चिंता वाढली आहे. बंद आणि गर्दीच्या जागांमध्ये असे विषाणू वेगाने पसरतात, त्यामुळे क्रूझ जहाजे विशेष संवेदनशील मानली जातात.
नोरोव्हायरस हा अतिशय संसर्गजन्य विषाणू असून तो प्रामुख्याने दूषित अन्न, पाणी, संक्रमित व्यक्ती किंवा घाणेरड्या पृष्ठभागांच्या संपर्कातून पसरतो. या विषाणूमुळे अचानक उलट्या, जुलाब, पोटदुखी, ताप आणि अशक्तपणा जाणवू शकतो. बहुतांश रुग्ण काही दिवसांत बरे होतात, मात्र लहान मुले, वृद्ध आणि कमजोर प्रतिकारशक्ती असलेल्या लोकांसाठी हा संसर्ग धोकादायक ठरू शकतो.