तैवानची प्रमुख चिपनिर्मिती कंपनी फॉक्सकॉनची भारतीय युनिट ‘फॉक्सकॉन होन हाई टेक्नॉलॉजी इंडिया मेगा डेव्हलपमेंट प्रायव्हेट लिमिटेड’ कर्नाटकातील बेंगळुरू ग्रामीण जिल्ह्यात एका वादात अडकली आहे. स्थानिक ग्रामपंचायतीने कंपनीवर स्थानिक कर न भरल्याचे, बांधकाम नियमांचे उल्लंघन केल्याचे आणि आजूबाजूच्या गावांतील तरुणांना रोजगारापासून वंचित ठेवल्याचे आरोप केले आहेत. या प्रकरणी ग्रामपंचायतीने कठोर भूमिका घेत कायदेशीर कारवाईचा इशाराही दिला आहे.
सोमवार, २ फेब्रुवारी रोजी बेंगळुरू ग्रामीण जिल्ह्यातील ग्रामपंचायतीने फॉक्सकॉनला औपचारिक नोटीस बजावली. या नोटिसीत मंजूर बांधकाम नकाशे, बांधकाम परवाने, बांधकाम पूर्णता व अधिभोग प्रमाणपत्र, तसेच सर्व्हेनुसार क्षेत्रफळाशी संबंधित कागदपत्रांची मागणी करण्यात आली आहे. ही नोटीस डोड्डागोल्लाहल्ली आणि अरुवनहल्ली गावांतील फॉक्सकॉनच्या सुविधांशी संबंधित असून, त्यांचे एकूण क्षेत्रफळ सुमारे ५.३३ लाख चौरस मीटर असल्याचे सांगण्यात आले आहे.
ग्रामपंचायत अधिकाऱ्यांच्या मते, या दोन्ही गावांमध्ये मोठ्या प्रमाणावर बांधकाम आधीच पूर्ण झाले असून कथितपणे उत्पादन क्रियाही सुरू झाल्या आहेत. मात्र, सरकारी नोंदींमध्ये संबंधित जमीन अद्याप मोकळा प्लॉट म्हणून नोंदवलेली आहे. ग्रामपंचायतीने याला कायदेशीर जबाबदाऱ्यांचे गंभीर उल्लंघन असल्याचे म्हटले आहे. नोटिसीत नमूद करण्यात आले आहे की, कंपनीने सात दिवसांच्या आत मागितलेली माहिती व कागदपत्रे सादर न केल्यास, कर्नाटक ग्राम स्वराज आणि पंचायत राज अधिनियमांतर्गत कायदेशीर कारवाई सुरू केली जाईल. यासोबतच ग्रामपंचायतीने फॉक्सकॉनवर स्थानिक कर न भरल्याचाही आरोप केला आहे. पंचायत अधिकाऱ्यांचे म्हणणे आहे की, याच परिसरात असलेले आंतरराष्ट्रीय विमानतळ आणि इतर अनेक औद्योगिक युनिट्स नियमितपणे स्थानिक स्वराज्य संस्थांना कर भरतात, मात्र फॉक्सकॉनकडून आतापर्यंत असा कोणताही कर भरलेला नाही.
हे ही वाचा:
पाकिस्तानातून आलेल्या दलित हिंदूंना निवारा द्या!
गणेश खणकरांची भाजप गटनेतेपदी वर्णी
कोलकात्यातील रेस्तराँकडून गोमांस दिल्याची कबुली, मागितली माफी
गाझा- इजिप्तमधील रफाह क्रॉसिंग अंशतः उघडले
याशिवाय, स्थानिक लोकप्रतिनिधी आणि ग्रामस्थांनी कंपनीने स्थानिक तरुणांना रोजगार देण्याची दिलेली आश्वासने पूर्ण न केल्याचा आरोप केला आहे. अनेकदा पत्रव्यवहार आणि बैठका होऊनही कंपनीने आवश्यक कागदपत्रे सादर केली नाहीत, तसेच स्थानिक लोकांना कायमस्वरूपी रोजगाराच्या संधी उपलब्ध करून दिल्या नसल्याचे त्यांचे म्हणणे आहे. ग्रामस्थांच्या मते, सुरुवातीच्या टप्प्यात स्थानिक रहिवाशांना मुलाखतीसाठी बोलावण्यात आले होते, मात्र नंतर कंपनीने इतर भागांतील कर्मचाऱ्यांची भरती केली. त्यामुळे गावांमध्ये असंतोष वाढत आहे. स्थानिकांनी इशारा दिला आहे की, त्यांच्या स्थानिक रोजगाराशी संबंधित मागण्यांवर लवकरच कारवाई न झाल्यास, ते या आठवड्याच्या अखेरीस मोठ्या प्रमाणावर आंदोलन सुरू करतील.
सध्या या आरोपांवर फॉक्सकॉनकडून कोणतीही अधिकृत प्रतिक्रिया समोर आलेली नाही. कंपनी पंचायतच्या नोटिसीला कसा प्रतिसाद देते आणि हा वाद कायदेशीर व राजकीय पातळीवर अधिक तीव्र होतो का, याकडे प्रशासकीय व औद्योगिक वर्तुळाचे लक्ष लागले आहे.
