उन्हाळ्यानंतर आता राज्यात मान्सूनचे आगमन जवळ आले आहे. वातावरणातील उष्णता, वाढलेली आर्द्रता आणि बदलणारे तापमान यामुळे या काळात विविध संसर्गजन्य आजारांचा धोका वाढतो. विशेषतः सर्दी, ताप, डेंग्यू, मलेरिया, पोटाचे विकार आणि त्वचेचे आजार यांचा प्रादुर्भाव वाढण्याची शक्यता असते. त्यामुळे मान्सून सुरू होण्यापूर्वीच आरोग्याची योग्य काळजी घेणे आवश्यक असल्याचे डॉक्टरांकडून सांगितले जात आहे.
तज्ज्ञांच्या मते, पावसाळ्याच्या सुरुवातीला हवामानात अचानक बदल होतो. याचा परिणाम शरीराच्या प्रतिकारशक्तीवर होऊ शकतो. त्यामुळे सकस आणि पौष्टिक आहार घेणे गरजेचे आहे. आहारात ताज्या भाज्या, फळे, डाळी, कडधान्ये आणि जीवनसत्त्वयुक्त पदार्थांचा समावेश करावा. विशेषतः व्हिटॅमिन ‘सी’युक्त फळे जसे संत्री, मोसंबी, लिंबू यांचा वापर वाढवल्यास रोगप्रतिकारक शक्ती मजबूत राहते.
हे ही वाचा:
लोन ॲपच्या जाळ्यात अडकवून खंडणी उकळणारी टोळी गजाआड
फायटर जेट शर्यतीत टाटा, एलअँडटी आणि भारत फोर्ज आघाडीवर
गोरेगावात रोटीवर थुंकून ग्राहकांना जेवण वाढले…
बायजू रवींद्रनला सिंगापूर न्यायालयाने ठोठावली ६ महिन्यांची शिक्षा
पावसाळ्यात दूषित पाणी आणि अन्नामुळे पोटाचे विकार वाढण्याचा धोका असतो. त्यामुळे उकळून किंवा फिल्टर केलेले पाणीच पिण्याचा सल्ला डॉक्टर देतात. रस्त्यावरील उघड्यावर मिळणारे पदार्थ टाळावेत. घरातील अन्न ताजे आणि स्वच्छ असणे आवश्यक आहे. तसेच अन्न झाकून ठेवणेही महत्त्वाचे ठरते.
मान्सूनपूर्व काळात डासांची संख्या वाढू लागते. त्यामुळे डेंग्यू आणि मलेरियासारख्या आजारांचा धोका वाढतो. घराच्या परिसरात पाणी साचू देऊ नये, कुलर आणि टाक्यांची नियमित स्वच्छता करावी तसेच डास प्रतिबंधक उपायांचा वापर करावा, असे आरोग्य विभागाने स्पष्ट केले आहे.
त्वचेच्या समस्या टाळण्यासाठी शरीर आणि कपडे स्वच्छ ठेवणे गरजेचे आहे. ओले कपडे जास्त वेळ अंगावर ठेवू नयेत. पावसात भिजल्यानंतर शक्य तितक्या लवकर कोरडे कपडे परिधान करावेत. तसेच पायांची स्वच्छता राखल्यास बुरशीजन्य संसर्ग टाळता येऊ शकतो.
मान्सूनपूर्व काळात नियमित व्यायाम, पुरेशी झोप आणि मानसिक तणाव कमी ठेवणेही आरोग्यासाठी आवश्यक मानले जाते. बदलत्या हवामानात लहान मुले, ज्येष्ठ नागरिक आणि दीर्घकालीन आजार असलेल्या व्यक्तींनी अधिक काळजी घेण्याची गरज असल्याचे तज्ज्ञ सांगतात. आरोग्यदायी सवयी अंगीकारून आणि वेळेवर खबरदारी घेतल्यास पावसाळ्यातील अनेक आजारांपासून स्वतःचे आणि कुटुंबाचे संरक्षण करणे शक्य होणार आहे.