महाराष्ट्रातील २९ महानगरपालिकांसाठी गुरुवार, १५ जानेवारी रोजी सकाळी मतदान सुरू झाले. या लढतीत मुंबई महानगरपालिकेच्या निवडणुकीकडे सर्वाधिक लक्ष असणार आहे. ८९३ वॉर्डांमधील २,८६९ जागांसाठी सकाळी ७.३० वाजता मतदान सुरू झाले. मतदान प्रक्रिया सायंकाळी ५.३० वाजेपर्यंत चालेल, ज्यामध्ये ३.४८ कोटी मतदार १५,९३१ उमेदवारांचे भवितव्य ठरवण्यास पात्र आहेत.
मुंबईतील बृहन्मुंबई महानगरपालिकेत (BMC) नऊ वर्षांच्या अंतराने निवडणुका होत आहेत. ७४,४०० कोटी रुपयांपेक्षा जास्त वार्षिक बजेट असलेल्या या महानगरपालिकेत २२७ जागांसाठी १,७०० उमेदवार निवडणूक लढवत आहेत. निवडणुकीदरम्यान कायदा आणि सुव्यवस्था राखण्यासाठी शहरात २५,००० हून अधिक पोलिस कर्मचारी तैनात करण्यात आले आहेत. मतमोजणी १६ जानेवारी रोजी होणार आहे.
बृहन्मुंबई महानगरपालिका निवडणुकीत ज्येष्ठ नागरिक, राजकारणी आणि सेलिब्रिटींसह सर्व स्तरातील नागरिकांनी आपला मतदानाचा हक्क बजावण्यासाठी शहरातील मतदान केंद्रांवर लवकर हजेरी लावली. मतदान केल्यानंतर अभिनेता अक्षय कुमारने मुंबईकरांना त्यांचे नागरी कर्तव्य गांभीर्याने घेण्याचे आवाहन केले. पत्रकारांशी बोलताना तो म्हणाला, “आज मुंबई महापालिकेसाठी मतदान होत आहे. मुंबईकर म्हणून आज आपल्याकडे रिमोट कंट्रोल आहे. मी मुंबईतील सर्व लोकांना मोठ्या संख्येने बाहेर पडून मतदान करण्याची विनंती करेन.”
नागपूर महानगरपालिका निवडणुकीत मतदान केल्यानंतर, राष्ट्रीय स्वयंसेवक संघाचे सरसंघचालक मोहन भागवत यांनी लोकशाही व्यवस्थेत नागरिकांच्या सहभागाचे महत्त्व अधोरेखित केले. मतदान केंद्राबाहेर पत्रकारांशी बोलताना मोहन भागवत म्हणाले, “लोकशाही व्यवस्थेत, सरकार निवडण्यासाठी मतदान करणे आवश्यक असते आणि म्हणूनच ते प्रत्येक नागरिकाचे कर्तव्य आहे. संतुलित मत आणि लोकांच्या कल्याणाचा विचार करून, योग्य उमेदवाराला मतदान करणे हे आपले कर्तव्य आहे.”
हे ही वाचा:
लष्कर ए तोयबाच्या तोफा पाकिस्तान विरुद्ध वळतायत का भारताचे धुरंधर नव्या मिशनवर ?
I-PAC बाबतची तृणमूलची याचिका कोर्टाने फेटाळली
मास्टर ब्लास्टर सचिन तेंडुलकर यांनीही मुंबईत सहकुटुंब मतदानाचा हक्क बजावला. यावेळी सचिन तेंडुलकरने नागरिकांना मतदानाचे आवाहन केले आहे. क्रिकेटमध्ये ज्याप्रकारे प्रत्येक धाव महत्त्वाची असते, तशाच प्रकारे लोकशाहीत प्रत्येक तुमचे मत महत्त्वाचे आहे, अशा शब्दात सचिन तेंडूलकर यांनी नागरिकांना मतदानाचे आवाहन केले.
