केंद्रीय रस्ते वाहतूक व महामार्ग मंत्री नितीन गडकरी यांच्या नागपूर येथील निवासस्थानी बॉम्बने उडवण्याची धमकी मिळाली आहे. नागपूर पोलिसांच्या आपत्कालीन क्रमांक ११२ वर ही धमकी दिली गेली. यानंतर पोलिसांनी गडकरींच्या घराची तातडीने झडती घेतली. गडकरींचं वर्धा रोडवरील ‘एनरिको हाइट्स’ या निवासस्थानी रविवारी सकाळी ८:४६ वाजता ही धमकी दिली गेली. एक अज्ञात व्यक्तीने पोलिसांच्या ११२ नंबरवर कॉल करून ही माहिती दिली होती.
धमकी मिळताच प्रतापनगर पोलीस ठाण्याला तत्काळ सूचना देण्यात आली आणि पोलिसांनी गडकरींच्या निवासस्थानी धाव घेतली. तपासणीदरम्यान कोणतीही संशयास्पद वस्तू आढळून आली नाही, अशी माहिती पोलिसांनी दिली आहे. झोन-१ चे डीसीपी ऋषिकेश रेड्डी यांनी सांगितले की, पोलिसांनी अज्ञात कॉल करणाऱ्याविरोधात गुन्हा दाखल केला आहे आणि त्याचा शोध सुरू आहे. कॉल करणाऱ्याची ओळख पटवण्याचे काम सुरू आहे.
हेही वाचा..
‘विरोधी पक्ष म्हणजे केवळ पप्पूची आघाडी
रेल्वे मार्गावर नक्षलवाद्यांचे कारस्थान उधळले
कुलगाममध्ये आतापर्यंत ३ दहशतवादी ठार
गडकरी सध्या नागपूरमध्येच उपस्थित असल्याने त्यांच्या सुरक्षेची पातळी वाढवण्यात आली आहे. संपूर्ण घटनेचा गंभीरतेने तपास सुरू आहे. हे पहिल्यांदाच घडलेलं नाही. यापूर्वीही अनेक महत्त्वाच्या व्यक्तींना आणि ठिकाणांना बॉम्बने उडवण्याच्या धमक्या दिल्या गेल्या आहेत. उदाहरणार्थ, १३ जुलै रोजी केंद्रीय मंत्री आणि लोजपा (रामविलास) अध्यक्ष चिराग पासवान यांना धमकी देणाऱ्या आरोपीला पोलिसांनी अटक केली होती. तो आरोपी बिहारच्या बेगूसराय जिल्ह्यातील भीड़हा गावचा २१ वर्षीय मोहम्मद मेराज होता.
तसेच, २६ जुलै रोजी मुंबई पोलिस कंट्रोल रूममध्ये सीएसएमटी (छत्रपती शिवाजी महाराज टर्मिनस) स्टेशनवर बॉम्ब ठेवण्यात आल्याची माहिती देण्यात आली होती, मात्र तपासात कोणताही स्फोटक पदार्थ आढळून आला नव्हता.
