भोजपुरी चित्रपटसृष्टीत आपल्या खास शैलीने ओळख निर्माण करणारी अभिनेत्री अक्षरा सिंह केवळ अभिनयासाठीच नव्हे, तर सामाजिक विषयांवर आपल्या परखड मतांसाठीही ओळखली जाते. अलीकडेच बिहारमध्ये आगामी विधानसभा निवडणुकीची चर्चा रंगू लागल्याने सोशल मीडियापासून जनतेच्या चर्चांपर्यंत अनेक प्रश्न उपस्थित होऊ लागले – “अक्षरा सिंह राजकारणात प्रवेश करणार का?” काँग्रेस पक्षाच्या काही कार्यक्रमांतील तिची उपस्थिती आणि काही नेत्यांसोबतचे फोटो यामुळे अशा चर्चांना अधिकच हवा मिळाली. लोकांच्या मनात प्रश्न निर्माण झाला की, “अक्षरा सिंह बिहारच्या राजकारणात झेंडा रोवणार का?”
या सर्व चर्चांना पूर्णविराम देत अक्षरा सिंहने अखेर मौन सोडलं आणि आयएएनएसला दिलेल्या मुलाखतीत स्पष्ट भूमिका मांडली. अक्षरा म्हणाली, “जेव्हा निवडणूक लढवेन, तेव्हा तुम्हा सर्वांना स्वतःहून बोलावून सांगेन. सध्या तरी माझी अशी काही योजना नाही. मी सध्या जो काम करत आहे, त्यातच मनापासून झोकून दिलं आहे आणि त्यासाठी तुमचं पाठबळ हवं आहे. तिने हेही स्पष्ट केलं की, “मी आजही कोणत्याही राजकीय पक्षाशी जोडलेली नाही. पूर्वीही सांगितलं होतं की, एका चांगल्या विचारसरणीसोबत काही ठिकाणी गेले होते आणि भविष्यातही गरज भासल्यास त्या विचारांसोबत उभं राहणं पसंत करेन. पण निवडणुकीशी माझा काहीही संबंध नाही.”
हेही वाचा..
राहुल गांधींचं मौन म्हणजे पाकिस्तानप्रेम
पाकिस्तानात पावसामुळे ६० जणांचा मृत्यू
भारतीय लष्कराला लवकरच मिळणार ७,००० नवीन AK-203 रायफल्स, उत्पादन पूर्णपणे देशी
मुंबईत ईडीचे छापे: छंगूर बाबा संबंधित कथित धर्मांतर रॅकेट प्रकरणी चौकशी सुरू
बिहारमध्ये १२५ युनिट मोफत वीज देण्याच्या घोषणेबाबत विचारल्यावर अक्षरा सिंह म्हणाली, “ही एक अत्यंत मोठी आणि स्तुत्य घोषणा आहे. बिहारमधील जनतेसाठी सरकारचा हा विचार खूपच प्रशंसनीय आहे. अशीच अपेक्षा आहे की बिहार अधिक यशस्वी होईल आणि विकासाच्या नव्या शिखरांवर पोहोचेल.” अक्षरा सध्या आपल्या आगामी चित्रपट ‘रुद्र शक्ती’च्या प्रमोशनमध्ये व्यस्त आहे. या चित्रपटाचे दिग्दर्शन निशांत एस. शेखर यांनी केले असून निर्माता सी. बी. सिंह आहेत.
बिभूती एंटरटेनमेंटच्या बॅनरखाली तयार झालेल्या या चित्रपटाची कथा मनमोहन तिवारी यांनी लिहिली असून ते या चित्रपटात अभिनेता म्हणूनही झळकणार आहेत. चित्रपटातील संगीत ओम झा यांनी दिलं असून गाणी राकेश निराला आणि प्यारेलाल यादव यांनी लिहिली आहेत. ‘रुद्र शक्ती’ हा चित्रपट १८ जुलै रोजी चित्रपटगृहांमध्ये प्रदर्शित होणार आहे.
