अमेरिकेत कृत्रिम बुद्धिमत्ता (एआय) संदर्भात सरकार आणि तंत्रज्ञान कंपन्यांमधील संघर्ष तीव्र होत असल्याचे दिसत आहे. Anthropic या कंपनीच्या ‘क्लॉड एआय’ प्रणालीला अमेरिकेच्या फेडरल सरकारी नेटवर्कमधून टप्प्याटप्प्याने हटवण्याची तयारी सुरू झाली आहे. दुसरीकडे, कंपनीने पेंटागॉनकडून लावण्यात आलेल्या पुरवठा साखळी जोखमीच्या आरोपांविरोधात न्यायालयात खटला दाखल केला आहे.
माध्यमांच्या अहवालानुसार, व्हाईट हाऊस सध्या एका कार्यकारी आदेशावर काम करत आहे. या आदेशानुसार अमेरिकेतील सर्व फेडरल सरकारी संस्थांना क्लॉड एआयचा वापर बंद करण्याचे निर्देश दिले जाऊ शकतात. अधिकाऱ्यांच्या माहितीनुसार हा आदेश याच आठवड्यात जारी होण्याची शक्यता असून त्यानंतर सर्व विभागांना सरकारी कामकाजात क्लॉड एआयचा वापर थांबवावा लागेल.
माहितीनुसार, अमेरिकेतील अनेक सरकारी विभागांनी आधीच आपल्या प्रणालीतून ही तंत्रज्ञान सेवा हटवण्याची प्रक्रिया सुरू केली आहे. प्रशासन या प्रकरणात आणखी कडक पावले उचलण्याच्या विचारात असल्याचेही सांगितले जात आहे. प्रत्यक्षात हा वाद डोनाल्ड ट्रम्प यांच्या प्रशासन आणि अँथ्रोपिक यांच्यात लष्करी व सुरक्षा उद्देशांसाठी एआयच्या वापराबाबत असलेल्या मतभेदांमुळे निर्माण झाला आहे. या संघर्षाचे मुख्य कारण म्हणजे अँथ्रोपिकने आपल्या एआय मॉडेलवर घातलेले सुरक्षा निर्बंध. कंपनीने आपल्या प्रणालीत अशी सुरक्षा तरतूद ठेवली आहे की, त्याचा मोठ्या प्रमाणावर नागरिकांवर नजर ठेवण्यासाठी किंवा पूर्णपणे स्वायत्त शस्त्र प्रणालींमध्ये वापर होऊ नये.
मात्र दुसरीकडे, अमेरिकेच्या संरक्षण विभागाचे मत आहे की एआय साधनांचा वापर कायदेशीर चौकटीत केला जाऊ शकतो, ज्यामध्ये संवेदनशील गुप्तचर कामे आणि युद्धक्षेत्राशी संबंधित ऑपरेशन्सही समाविष्ट आहेत. या मुद्द्यावर गेल्या काही महिन्यांत कंपनी आणि संरक्षण विभागामध्ये मतभेद उघड झाले आहेत. फेब्रुवारीमध्ये अँथ्रोपिकने संरक्षण विभागाची मागणी नाकारल्यानंतर कंपनीला “पुरवठा साखळी जोखीम” असा दर्जा देण्यात आला. सामान्यतः असा टॅग परकीय-विरोधी देशांशी संबंधित कंपन्यांवर लावला जातो आणि त्यामुळे सरकारी कंत्राटदारांना त्या कंपनीच्या तंत्रज्ञानापासून दूर राहण्यास भाग पाडले जाऊ शकते.
हे ही वाचा:
इंडोनेशिया भारताकडून खरेदी करणार ‘ब्रह्मोस’! करारावर स्वाक्षरी
बंगळूरूमधील हॉटेल बंदला कर्नाटकच्या मुख्यमंत्र्यांचा पाठिंबा
एलपीजी पुरवठ्यातील व्यत्ययामुळे मुंबईतील २०% हॉटेल्स, रेस्टॉरंट्स बंद
चीनच्या स्टेल्थ फायटरला भारताचे ‘घातक’ उत्तर!
या निर्णयाविरोधात अँथ्रोपिकने पेंटागॉनविरोधात न्यायालयात खटला दाखल केला आहे. कंपनीने दाखल केलेल्या याचिकेत सरकारचा निर्णय बेकायदेशीर असल्याचे म्हटले आहे. कंपनीच्या मते हा निर्णय तिच्या घटनात्मक अधिकारांचे उल्लंघन करतो आणि त्यामुळे तिच्या व्यवसायाला गंभीर व अपरिवर्तनीय नुकसान होत आहे. दरम्यान, हा वाद आता अमेरिकन सरकार आणि एका मोठ्या एआय विकसक कंपनीमधील सर्वाधिक चर्चेचा संघर्ष बनला आहे.
