आरसीबीला धक्का, पूजा वस्त्राकर दुखापतीमुळे बाहेर

महिला प्रीमियर लीग २०२६ च्या उद्घाटन सामन्यात शुक्रवारी रॉयल चॅलेंजर्स बेंगळुरू (आरसीबी) ने मुंबई इंडियन्स संघावर शेवटच्या चेंडूवर थरारक विजय मिळवला असला, तरी या विजयानंतर आरसीबीला मोठा धक्का बसला आहे. संघाची वेगवान गोलंदाज पूजा वस्त्राकर हॅमस्ट्रिंग दुखापतीमुळे पुढील दोन आठवड्यांसाठी स्पर्धेतून बाहेर झाली आहे.

पूजा वस्त्राकरच्या अनुपस्थितीची अधिकृत माहिती आरसीबीचे मुख्य प्रशिक्षक मलोळन रंगराजन यांनी दिली. मुंबई इंडियन्सविरुद्धच्या सामन्यानंतर माध्यमांशी बोलताना ते म्हणाले, “पूजा सध्या निवडीसाठी उपलब्ध नाही. बीसीसीआयमध्ये पुनर्वसनासाठी असताना तिला हॅमस्ट्रिंग दुखापत झाली आहे. त्यामुळे ती किमान दोन आठवडे बाहेर राहणार आहे.”

नीलामीदरम्यान पूजा बीसीसीआयच्या ‘सेंटर ऑफ एक्सलन्स’मध्ये रिकव्हरी प्रक्रियेत होती. लीग सुरू होईपर्यंत ती पूर्णपणे तंदुरुस्त होईल, अशी अपेक्षा होती. मात्र रिलीज होण्याच्या अगदी आधी तिला हॅमस्ट्रिंग दुखापत झाली आणि तिच्या पुनरागमनाला पुन्हा विलंब झाला.

उजव्या हाताची वेगवान गोलंदाज असलेली पूजा वस्त्राकर मागील तीन हंगामांत मुंबई इंडियन्सचा भाग होती. महिला प्रीमियर लीग २०२६ साठी झालेल्या लिलावात आरसीबीने तिला ८५ लाख रुपयांना विकत घेतले होते. संघाच्या संतुलनासाठी पूजा महत्त्वाची खेळाडू मानली जाते. वेगवान गोलंदाजीसोबतच ती खालच्या फळीत उपयुक्त फलंदाजीही करते.

पूजाच्या टी२० कारकिर्दीकडे पाहिल्यास तिने ७२ आंतरराष्ट्रीय टी२० सामन्यांत ५८ विकेट घेतल्या आहेत, तर ४३ डावांत ३३२ धावा केल्या आहेत. महिला प्रीमियर लीगमध्ये आतापर्यंत खेळलेल्या १६ सामन्यांत तिने १२६ धावा आणि ७ विकेट्स मिळवल्या आहेत.

दुखापतीमुळे बराच काळ क्रिकेटपासून दूर असलेली पूजा महिला प्रीमियर लीगमधून दमदार पुनरागमन करेल, अशी अपेक्षा होती. मात्र हॅमस्ट्रिंग दुखापतीमुळे तिच्या पुनरागमनाची वाट पाहावी लागणार आहे.