‘रेमल’ चक्रीवादळाचा तडाखा काही राज्यांना बसत असतानाच वादळामुळे मुसळधार पाऊस देखील सुरू आहे. मिझोराममधील ऐझॉल शहरातील दगडी खाण कोसळल्याची दुर्घटना घडली आहे. या दुर्घटनेत १० खाण कामगारांचा मृत्यू झाला, तर अनेकजण बेपत्ता झाले आहेत. खाण कोसळल्याने आजूबाजूची अनेक घरेही उद्ध्वस्त झाली आहेत. या ठिकाणी युद्धपातळीवर बचावकार्य सुरू असल्याची माहिती पोलिसांनी दिली आहे.
बंगालच्या उपसागरात निर्माण झालेले चक्रीवादळ ‘रेमल’ने पश्चिम बंगाल, बांगलादेश आणि आता मिझोराममध्ये हाहाःकार उडवून दिला आहे. रेमल चक्रीवादळाच्या तडाख्यामुळे मिझोरामधील ऐझॉल शहराच्या दक्षिणेकडील सीमेवरील मेल्थम आणि ह्लिमेन दरम्यानच्या भागात असलेली दगडी खाण कोसळून सकाळी ६ च्या सुमारास ही दुर्घटना घडली. मंगळवारी सकाळी मुसळधार पावसात ही खाण कोसळून दहा जणांचा मृत्यू झाला, अनेक बेपत्ता झाले, असे पोलिसांनी सांगितले.
हे ही वाचा:
बोनेटवर बसून बीएमडब्ल्यूची सफर करणाऱ्याला अटक, चालकाचे वडीलही ताब्यात!
इस्रायलचे नेत्यानाहू म्हणतात, क्षेपणास्त्र डागली, चूक झाली!
एनआयएची मोठी कारवाई; परदेशात नोकरीचे आमिष दाखवून फसवणूक करणारी टोळी उध्वस्त
मृतांचे मृतदेह बाहेर काढण्यात आले आहेत. तथापि, इतर अनेक लोक अजूनही ढिगाऱ्याखाली अडकले आहेत, असे एका पोलीस अधिकाऱ्याने सांगितले. संततधार पावसामुळे बचाव कार्यावर परिणाम होत असल्याचेही त्यांनी म्हटले. तर, घटनास्थळावरून सुटका करण्यात आलेल्यांना पुढील उपचारासाठी तातडीने जवळच्या रुग्णालयात नेण्यात आले आहे. राज्यभरात अनेक ठिकाणी मुसळधार पावसामुळे भूस्खलन झाले आहे, असे अधिकाऱ्यांनी सांगितले. हुंथर येथे राष्ट्रीय महामार्ग ६ वर भूस्खलन झाल्यामुळे ऐझॉलचा देशाच्या इतर भागापासून संपर्क तुटला आहे, अशी माहिती आहे. तसेच भूस्खलनामुळे विविध आंतरराज्य महामार्गही विस्कळीत झाले आहेत, असेही ते म्हणाले. पावसाच्या हजेरीमुळे सर्व शाळा बंद ठेवण्यात आल्या होत्या आणि अत्यावश्यक सेवा पुरवणाऱ्या कर्मचाऱ्यांशिवाय सरकारी कर्मचाऱ्यांना घरून काम करण्यास सांगण्यात आले होते.
