डिफेन्स रिसर्च अँड डेव्हलपमेंट ऑर्गनायझेशन (डीआरडीओ) ने १५ जून रोजी ओडिशा किनाऱ्याजवळील डॉ ए. पी. जे अब्दुल कलाम आयलंड येथून लाँग रेंज लँड अटॅक क्रूझ मिसाइल (LRLACM) ची यशस्वी चाचणी केली. चांदीपूर येथील एकात्मिक चाचणी क्षेत्रात (ITR) तैनात विविध ट्रॅकिंग उपकरणांनी मिळवलेल्या माहितीनुसार, चाचणीची सर्व उद्दिष्टे पूर्णपणे साध्य झाली.
LRLACM हे पूर्णपणे स्वदेशी विकसित केलेले क्षेपणास्त्र असून त्यातील सर्व उपप्रणाली डीआरडीओच्या विविध प्रयोगशाळा आणि भारतीय उद्योग भागीदारांनी विकसित केल्या आहेत. चाचणीदरम्यान डीआरडीओचे वरिष्ठ अधिकारी तसेच भारतीय नौदल आणि हवाई दलाचे प्रतिनिधी उपस्थित होते.
संरक्षण मंत्री राजनाथ सिंह यांनी LRLACM च्या यशस्वी चाचणीबद्दल डीआरडीओच्या शास्त्रज्ञांचे आणि उद्योग भागीदारांचे अभिनंदन केले. संरक्षण सचिव तसेच डीआरडीओचे अध्यक्ष राजेश कुमार सिंग यांनी प्रक्षेपणादरम्यान सर्व कामकाजावर देखरेख ठेवली. त्यांनी यशस्वी चाचणीमध्ये सहभागी सर्व सदस्यांचे अभिनंदन केले.
हे ही वाचा:
मे महिन्यात दुचाकी विक्री १९ लाखांच्या पार
डिजिटलीकरण, एआय क्षेत्रातील प्रगतीमध्ये भारत अनेक विकसित देशांच्या पुढे
“ट्रम्प यांचा करार बंधनकारक नाही”
यापूर्वी १३ जून रोजी डीआरडीओने देशाच्या संरक्षण क्षमतांना बळकटी देणाऱ्या अनेक महत्त्वाच्या तंत्रज्ञानांचे यशस्वी प्रदर्शन केले होते. १० आणि ११ जून २०२६ रोजी सलग तीन उड्डाण चाचण्या घेऊन लांब पल्ल्याच्या बॅलिस्टिक क्षेपणास्त्रांपासून आणि मध्यम अंतरावरील अँटी-शिप धोक्यांपासून संरक्षण देणाऱ्या बहुस्तरीय क्षेपणास्त्र संरक्षण प्रणालीची क्षमता दाखवण्यात आली. इंटरसेप्टर क्षेपणास्त्रांनी आपापली लक्ष्ये यशस्वीपणे नष्ट केली.
या प्रणाली नवीन प्रकारच्या क्षेपणास्त्र धोक्यांचा सामना करण्यासाठी आधुनिक तंत्रज्ञानाचा वापर करून विकसित करण्यात आल्या आहेत. या यशस्वी चाचण्यांमुळे भारत अशा मोजक्या देशांच्या यादीत सामील झाला आहे ज्यांच्याकडे आंतरखंडीय बॅलिस्टिक क्षेपणास्त्र (ICBM)रोखण्याची क्षमता असलेली बीएमडी प्रणाली आहे.
तसेच नेव्हल अँटी-शिप मिसाइल – मीडियम रेंज (NSM-MR) ची पहिली उड्डाण चाचणीही यशस्वीरीत्या पार पडली. या सर्व चाचण्या डीआरडीओ आणि संरक्षण दलांच्या वरिष्ठ अधिकाऱ्यांच्या उपस्थितीत घेण्यात आल्या. संरक्षण मंत्री राजनाथ सिंह यांनी या महत्त्वपूर्ण तंत्रज्ञानांच्या यशस्वी प्रदर्शनाबद्दल डीआरडीओचे विशेष अभिनंदन केले.
