आयसीसी महिला टी-२० विश्वचषक २०२६ मध्ये दमदार फलंदाजी करणाऱ्या ऑस्ट्रेलियाच्या बेथ मूनी हिने आयसीसीच्या ताज्या महिला टी-२० फलंदाजांच्या क्रमवारीत पुन्हा अव्वल स्थान पटकावले आहे. विश्वचषकात २३८ धावा करत तिने ऑस्ट्रेलियाला विक्रमी सातव्यांदा विजेतेपद मिळवून देण्यात मोलाचा वाटा उचलला.
स्पर्धेत ४७.६० च्या सरासरीने धावा करणाऱ्या मूनीला ‘प्लेअर ऑफ द सीरिज’ पुरस्कार मिळाला. अंतिम सामन्यात तिने ४९ चेंडूत ६४ धावांची (१० चौकार) खेळी करत ‘प्लेअर ऑफ द मॅच’ पुरस्कारही पटकावला. तिच्या कारकिर्दीत पाचव्यांदा ती टी-२० फलंदाजांच्या क्रमवारीत जगातील नंबर-१ बनली आहे.
ताज्या क्रमवारीत ७८५ रेटिंग गुणांसह मूनी अव्वल स्थानी पोहोचली आहे. तिची सहकारी जॉर्जिया व्होल (७७९) दुसऱ्या, तर दक्षिण आफ्रिकेची लॉरा वोल्वार्ड्ट (७७१) तिसऱ्या स्थानावर घसरली आहे. त्यानंतर हेली मॅथ्यूज (७५४) चौथ्या, तर भारताची स्मृती मंधाना (७४६) पाचव्या स्थानावर कायम आहे.
दक्षिण आफ्रिकेची ताझमिन ब्रिट्स तीन स्थानांची झेप घेत अकराव्या, तर इंग्लंडची कर्णधार नॅट सायव्हर-ब्रंट पाच स्थानांनी पुढे जात सोळाव्या क्रमांकावर पोहोचली आहे. विश्वचषकाच्या अंतिम फेरीत ऑस्ट्रेलियाविरुद्ध तिची नाबाद ५८ धावांची, तसेच उपांत्य फेरीत दक्षिण आफ्रिकेविरुद्ध ७५ धावांची खेळी तिच्यासाठी फायदेशीर ठरली.
गोलंदाजांच्या क्रमवारीत विश्वचषकात ५ सामन्यांत १४ बळी घेणारी भारताची फिरकीपटू श्री चरणी अव्वल स्थानावर कायम आहे.
इंग्लंडच्या सोफी एक्लेस्टोन (७२३) हिने दुसरे स्थान पटकावले असून चार्ली डीन (७२२) तिसऱ्या स्थानावर घसरली आहे. लॉरेन बेल पाचव्या, तर लिन्सी स्मिथ सातव्या स्थानावर कायम आहे.
दक्षिण आफ्रिकेची अष्टपैलू मारिजान कॅप चार स्थानांची झेप घेत दहाव्या क्रमांकावर पोहोचली आहे. ऑस्ट्रेलियाची वेगवान गोलंदाज किम गार्थ पंधराव्या स्थानावर पोहोचली असून इंग्लंडची फ्रेया कॅम्प अष्टपैलूंच्या क्रमवारीत तब्बल ३१ स्थानांची झेप घेत सत्ताविसाव्या क्रमांकावर पोहोचली आहे. अष्टपैलूंच्या क्रमवारीत ऑस्ट्रेलियाची अॅश गार्डनर पाकिस्तानची फातिमा सना हिला मागे टाकत सहाव्या स्थानावर पोहोचली आहे.
