सुट्टे पैसे नाहीत म्हणून कंडक्टरने कर्नाटकच्या मंत्र्यालाच उतरवले!

कर्नाटकचे परिवहन मंत्री बायरथी सुरेश यांनी परिवहन सेवेची स्थिती पाहण्यासाठी चेहरा झाकून बसेसमधून प्रवास केला आणि त्यांना वास्तवाची जाणीव झाली. बंगळुरूमध्ये शनिवारी गुप्तपणे बीएमटीसी बसने प्रवास करत असताना त्यांच्याकडे सुट्टे पैसे नसल्यामुळे वाहकाने (कंडक्टरने) त्यांना बसमधून उतरायला सांगितले. या घटनेमुळे दैनंदिन प्रवाशांना कोणत्या अडचणींचा सामना करावा लागतो, याचा त्यांना प्रत्यक्ष अनुभव आला.

जवळपास दोन तास चेहऱ्यावर मास्क घालून आणि १० हून अधिक बीएमटीसी बसमधून प्रवास करताना मंत्र्यांनी नियमित प्रवासी ज्या अनेक समस्यांबाबत तक्रारी करतात, त्या प्रत्यक्ष पाहिल्या. सर्वात गंभीर प्रकार तेव्हा घडला, जेव्हा एका बीएमटीसी बसने फन वर्ल्ड बसथांब्यावर प्रवाशाने उतरायचा इशारा करूनही बस थांबवली नाही. ही बाब लक्षात येताच बायरथी सुरेश यांनी तत्काळ त्या बसच्या चालक आणि वाहकाला निलंबित करण्याचे आदेश दिले.

या गुप्त तपासणीदरम्यान मंत्र्यांना प्रवाशांच्या नेहमीच्या तक्रारीचाही प्रत्यक्ष अनुभव आला. हेब्बळ-नागशेट्टीहळ्ळी मार्गावरील बसमध्ये प्रवास करताना त्यांनी तिकीट घेण्यासाठी वाहकाला १०० रुपयांची नोट दिली. मात्र, सुट्टे पैसे नसल्याचे सांगत वाहकाने त्यांना तिकीट देण्याऐवजी बसमधून उतरून जाण्यास सांगितले. त्यामुळे अनेक प्रवाशांना रोज भेडसावणाऱ्या समस्येचा अनुभव मंत्र्यांनाही आला.

हे ही वाचा:

पहिल्या हायड्रोजन ट्रेनचा प्रवास ८९ किलोमीटर

आता इथेनॉल इंधन, हे भारताचे भविष्य!

पूरीपेक्षाही उंच बांगलादेशातील धामराई रथयात्रेचा रक्तरंजित इतिहास!

सूरांचा अमर स्वर हरपला; दिग्गज गायिका एस. जानकी यांचे निधन

बसप्रवासानंतरही तपासणी थांबली नाही. नागशेट्टीहळ्ळी येथे उतरल्यावर त्यांनी एका रिक्षाचालकाशी संबंधित वादात हस्तक्षेप केला. संबंधित रिक्षाचालकाने मीटरवर ३० रुपये भाडे दिसत असतानाही प्रवाशाकडून ३६ रुपयांची मागणी केल्याचा आरोप होता.

या संपूर्ण अनुभवाला “वास्तवाचा धडा” असे संबोधत परिवहन मंत्री बायरथी सुरेश यांनी सांगितले की, बंगळुरूमध्ये अशा अचानक तपासण्या पुढेही सुरू राहतील. सार्वजनिक वाहतूक व्यवस्थेतील कर्मचाऱ्यांची जबाबदारी निश्चित करणे, शिस्त वाढवणे आणि प्रवाशांचा प्रवास अधिक सुरक्षित व सुलभ करणे हा यामागील उद्देश असल्याचे त्यांनी स्पष्ट केले. या गुप्त तपासणीमुळे बंगळुरूतील सार्वजनिक वाहतूक व्यवस्थेची गुणवत्ता सुधारण्यासाठी कर्नाटक सरकार अधिक कठोर भूमिका घेणार असल्याचे संकेत मिळत आहेत.