पश्चिम बंगालमधील तृणमूल काँग्रेस (TMC) मधील अंतर्गत संघर्ष अधिक तीव्र होत असताना पक्षप्रमुख ममता बॅनर्जी यांना आणखी एक मोठा धक्का बसला आहे. पक्षाचे ज्येष्ठ नेते आणि माजी मंत्री मदन मित्रा यांनी ऋतब्रत बॅनर्जी यांच्या नेतृत्वाखालील बंडखोर गटात प्रवेश केला आहे. यामुळे तृणमूल काँग्रेसमधील फूट आणखी गडद झाल्याचे मानले जात आहे.
मदन मित्रा यांनी कोलकात्यात आयोजित बैठकीत बंडखोर गटात प्रवेश केला. त्यानंतर ऋतब्रत बॅनर्जी यांनी त्यांची उत्तर २४ परगणा जिल्ह्याचे अध्यक्ष म्हणून नियुक्ती जाहीर केली. तृणमूलच्या संघटनात्मक पातळीवरील हा आणखी एक मोठा बदल मानला जात आहे.
गेल्या काही दिवसांत ममता बॅनर्जी यांच्या विश्वासू मानल्या जाणाऱ्या अनेक नेत्यांनी बंडखोर गटाची वाट धरली आहे. यापूर्वी अनुब्रत मंडल यांनी बंडखोर गटात प्रवेश करून बीरभूम जिल्हाध्यक्षपद स्वीकारले होते. त्यानंतर रवींद्रनाथ घोष यांनीही बंडखोर गटात प्रवेश करत अभिषेक बॅनर्जी यांना सक्रिय राजकारणापासून दूर ठेवण्याची मागणी केली होती. आता मदन मित्रा यांच्या निर्णयामुळे पक्षातील असंतोष अधिक उघड झाला आहे.
पश्चिम बंगाल विधानसभा निवडणुकीतील पराभवानंतर तृणमूल काँग्रेसमध्ये मोठी फूट पडली आहे. ऋतब्रत बॅनर्जी यांच्या नेतृत्वाखालील गटाने स्वतंत्र संघटनात्मक रचना उभी केली असून, पक्षाचे नाव आणि निवडणूक चिन्हावरही दावा केला आहे. यापूर्वी बंडखोर आमदारांनी अरूप रॉय यांची पक्षाध्यक्ष म्हणून घोषणा करत ममता बॅनर्जी यांच्या नेतृत्वालाच थेट आव्हान दिले होते.
हे ही वाचा:
बंगालमधील सरकार बदलल्यामुळे तस्लिमा नसरिन १९ वर्षांनी कोलकात्यात येणार
पीओके आंदोलनात लष्कर, जैशच्या दहशतवाद्यांना घुसवण्याचा कट?
मुंबईमधील कोस्टल रोडच्या बोगद्यात धावत्या कारला आग
बनावट सोन्याच्या विटा देऊन दागिने लंपास
मदन मित्रा यांच्या प्रवेशामुळे बंडखोर गटाची राजकीय ताकद आणखी वाढल्याचे मानले जात आहे. एकेकाळी ममता बॅनर्जी यांच्या अत्यंत विश्वासू नेत्यांपैकी असलेले मदन मित्रा यांचा निर्णय तृणमूल काँग्रेससाठी मोठा धक्का मानला जात आहे. आगामी काळात आणखी काही वरिष्ठ नेते बंडखोर गटात सहभागी होण्याची शक्यता वर्तवली जात असून, त्यामुळे पश्चिम बंगालच्या राजकारणात घडामोडींना आणखी वेग येण्याची चिन्हे आहेत.
