E२० पेट्रोलवर नितीन गडकरींचे मोठे स्पष्टीकरण

देशभरात E२० म्हणजेच २० टक्के इथेनॉल-मिश्रित पेट्रोलचा वापर वाढत असताना वाहनचालकांमध्ये मायलेज आणि इंजिनच्या सुरक्षिततेबाबत अनेक प्रश्न उपस्थित होत आहेत. या पार्श्वभूमीवर केंद्रीय रस्ते वाहतूक व महामार्ग मंत्री नितीन गडकरी यांनी संसदेत महत्त्वाचे स्पष्टीकरण देत नागरिकांच्या शंकांचे निरसन केले आहे. त्यांनी सांगितले की, E२० पेट्रोलचा वापर केल्यास वाहनाच्या प्रकार, इंजिनची रचना आणि वापराच्या पद्धतीनुसार इंधन कार्यक्षमता म्हणजेच मायलेज साधारण २ ते ६ टक्क्यांपर्यंत कमी होऊ शकते. मात्र, यामुळे इंजिनला कोणतेही गंभीर नुकसान होत असल्याचा कोणताही वैज्ञानिक पुरावा उपलब्ध नसल्याचे त्यांनी स्पष्ट केले.

गडकरी यांनी सांगितले की, E२० इंधन देशभरात कोणत्याही घाईगडबडीत लागू करण्यात आलेले नाही. वाहन उत्पादक कंपन्या, संशोधन संस्था आणि तज्ज्ञांच्या सल्ल्याने विविध स्तरांवर चाचण्या करूनच हे इंधन टप्प्याटप्प्याने लागू करण्यात आले आहे. त्यामुळे आधुनिक वाहनांमध्ये E२० पेट्रोलचा वापर सुरक्षित असून इंजिनच्या कार्यक्षमतेवर त्याचा प्रतिकूल परिणाम होत नाही.
हे ही वाचा:
नेपाळमध्ये हिंसाचाराने पुन्हा पेटले वातावरण

…वंदे मातरम् कहना होगा

तथापि, २००५ ते २०१६ दरम्यान तयार झालेल्या काही बीएस-३ वाहनांमध्ये इथेनॉलमुळे रबरच्या नळ्या, सील किंवा गॅस्केटसारख्या काही भागांवर परिणाम होण्याची शक्यता आहे. अशा वाहनांमध्ये आवश्यक असल्यास हे भाग बदलावे लागू शकतात. मात्र, इंजिनमध्ये मोठे तांत्रिक बदल करण्याची आवश्यकता नसल्याचे सरकारने स्पष्ट केले आहे.

सरकारच्या मते, E२० इंधनाचा सर्वात मोठा फायदा म्हणजे देशाचे आयात होणाऱ्या कच्च्या तेलावरील अवलंबित्व कमी होईल. यामुळे इंधन आयातीवरील खर्चात बचत होण्यास मदत होईल. त्याचबरोबर कार्बन उत्सर्जनात घट होऊन पर्यावरण संरक्षणालाही हातभार लागेल. इथेनॉल निर्मितीसाठी ऊस, मका आणि इतर कृषी उत्पादनांचा वापर होत असल्याने शेतकऱ्यांना अतिरिक्त बाजारपेठ उपलब्ध होऊन त्यांच्या उत्पन्नात वाढ होण्यास मदत होईल.

गडकरी यांनी नागरिकांना आवाहन करताना सांगितले की, मायलेजमध्ये किंचित घट होण्याची शक्यता असली तरी त्याबदल्यात देशाला ऊर्जा सुरक्षितता, स्वच्छ पर्यावरण आणि आत्मनिर्भर इंधन व्यवस्था यांसारखे दीर्घकालीन फायदे मिळणार आहेत. त्यामुळे E२० इंधनाबाबत भीती बाळगण्याचे कारण नसून, योग्य आणि सुसंगत वाहनांमध्ये त्याचा वापर सुरक्षित असल्याचे त्यांनी पुन्हा एकदा स्पष्ट केले.