अभिजित दिपकेला तातडीने अटक करा! दिल्ली पोलिसांकडे तक्रार

‘कॉकरोच जनता पार्टी’चे (सीजेपी) संस्थापक अभिजीत दिपके यांच्या विरोधात सोशल मीडिया प्रभावक फैजान अन्सारी यांनी ४ ऑगस्ट २०२६ रोजी दिल्ली पोलिसांकडे लेखी तक्रार दाखल केली आहे. दिपके यांच्या समर्थकांनी पुणे आणि औरंगाबाद येथे आपल्यावर हल्ला केल्याचा गंभीर आरोप अन्सारी यांनी तक्रारीत केला आहे.

अन्सारी यांनी दिल्ली पोलिसांकडे दिपके यांना तातडीने अटक करण्याची मागणी केली आहे. त्यांच्या म्हणण्यानुसार, पुणे आणि छत्रपती संभाजीनगर येथे त्यांच्यावर झालेल्या कथित हल्ल्यांप्रकरणी यापूर्वीच दोन प्रकरणे दाखल आहेत.

‘माझ्यावर पुणे आणि संभाजीनगरमध्ये हल्ला’

समाचार संस्था एएनआयशी बोलताना फैजान अन्सारी यांनी सांगितले की, त्यांनी सीजेपीचा संस्थापक अभिजीत दिपके याच्याविरोधात दिल्लीचे पोलीस उपायुक्त यांच्याकडे लेखी तक्रार दिली आहे. अन्सारी यांनी दावा केला की, दिपकेच्या समर्थकांनीच आपल्यावर हल्ला केला असून त्यासंदर्भात त्यांच्याकडे पुरावे आहेत. पुणे आणि संभाजीनगर येथे आपल्यावर हल्ले झाल्याचा आरोप करत या दोन्ही घटनांशी संबंधित प्रकरणे दाखल असल्याचेही त्यांनी म्हटले.

दिपके यांच्या अटकेची मागणी

फैजान अन्सारी यांनी दिल्ली पोलिसांना अभिजीत दिपके यांच्यावर तातडीने कारवाई करण्याचे आवाहन केले आहे. दिपके हे स्वतःच्या फायद्यासाठी आंदोलन आणि राजकीय घडामोडींचा वापर करत असल्याचा आरोपही अन्सारी यांनी केला.

मात्र, अन्सारी यांनी केलेले हे आरोप सध्या त्यांच्या तक्रारीतील दाव्यांवर आधारित आहेत. या आरोपांबाबत अभिजीत दिपके किंवा त्याच्या समर्थकांची अधिकृत प्रतिक्रिया समोर आलेली नाही.

हे ही वाचा:

फुकेत-दिल्ली एअर इंडियाच्या विमानाला एअर टर्ब्युलन्सचा तडाखा

शिक्षण, आरोग्य, समाजकारणातील युगाचा अंत; डॉ. डी. वाय. पाटील यांचे निधन

मोदी हे इस्रायलचे सर्वोच्च मित्र!

झुरळांनो उठा झारखंडमध्ये पेपर फुटलाय !

सोनम वांगचुक यांच्या अटकेचे समर्थन

फैजान अन्सारी यांनी दिल्लीच्या मुख्यमंत्री रेखा गुप्ता आणि पोलिसांचे कौतुक केले. सामाजिक कार्यकर्ते सोनम वांगचुक यांना योग्य वेळी ताब्यात घेतल्यामुळे दिल्लीतील परिस्थिती बिघडण्यापासून रोखण्यात मदत झाली, असा दावा त्यांनी केला. अन्सारी यांनी दिल्ली पोलिसांच्या कारवाईचे समर्थन करताना अभिजीत दिपके याच्यावरही टीका केली.

अभिजीत दिपके कोण आहेत?

अभिजीत दिपके हा आम आदमी पक्षाशी संबंधित माजी कार्यकर्ता असल्याचे सांगितले जाते. दिल्लीमध्ये झालेल्या चर्चित विद्यार्थी आंदोलनामुळे त्यांना राष्ट्रीय पातळीवर प्रसिद्धी मिळाली.

नीट-यूजी परीक्षेतील कथित पेपरफुटी आणि अनियमिततेच्या मुद्द्यावरून झालेल्या आंदोलनाचे नेतृत्व करताना दिपके चर्चेत आला होता. या आंदोलनादरम्यान तत्कालीन केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करण्यात आली होती. आंदोलनामुळे दिपकेची राजकीय आणि सामाजिक क्षेत्रात मोठी चर्चा झाली. त्यानंतर त्यांच्या समर्थकांशी संबंधित विविध आरोप-प्रत्यारोपही समोर येत आहेत.

आता पोलिसांच्या भूमिकेकडे लक्ष

फैजान अन्सारी यांच्या तक्रारीनंतर दिल्ली पोलीस या प्रकरणात कोणती कारवाई करतात, याकडे लक्ष लागले आहे. पुणे आणि संभाजीनगर येथील कथित हल्ल्यांशी संबंधित प्रकरणे, अन्सारी यांनी सादर केल्याचे सांगितलेले पुरावे आणि अभिजीत दिपके यांची भूमिका याची चौकशी होण्याची शक्यता आहे.